Sfuei Mensîl Furlan Indipendent
Archivi de Patrie

San Marc, il paîs plui sportîf dal Friûl | La associazion don Bosco: amicizie e agregazion

Francesco Tonizzo
Di çampe, Andrea Cecchini, Elena Cecchini, Pier Mauro Zanin e Stefano Bandolin

Intal piçul borc dongje di Merêt di Tombe si respire culture sportive e otegnin risultâts preseâts in tantis dissiplinis

Cuatricent animis, plui o mancul. E un cûr sportîf di no crodi. Al è il trat distintîf di San Marc di Merêt di Tombe, un paîs intal mieç dal Friûl indulà che a son nassûts une vore di campions di tantis dissiplinis sportivis. Tant che al è vignût fûr un piçul record. Forsit dome Dedeà, che al à cinc voltis i abitants di San Marc, al rive a svantâ un nivel di campions plui significatîf, contant Chiara Cainero, Alessandro Orlando e Franco Bertoli e diviers cicliscj. E no si pues meti dongje San Marc cun Buie, la patrie dai campions di ciclisim Alessandro De Marchi e Jonathan Milan, parcè che Buie e conte almancul sîs mil abitants, ven a stâi e je passe dîs voltis plui grande. Intal mês di Mai dal 2022, a San Marc a àn festezât sessante agns di storie sportive, sublimade dal passaç dal Zîr di Italie, intal percors de tape di Maran a Madone di Mont.
◆ La ocasion e je state perfete par meti adun ducj i campions che a àn fate la storie sportive dal borc. No dome cicliscj, partint di Franco Fioritto, il prin sanmarchês che si è fat viodi intes garis di biciclete tai agns Sessante, fin a Danilo Moretuzzo, dute la famee Cecchini, i Nigris, Tatiana Benedetti. Ancje altris dissiplinis, contant Vanni Lauzana, campion di solevament di pês, olimpionic a Barcelone intal 1992, Debora Zilli, campionesse taliane di atletiche lizere, e Elisa Manzano, zuiadore di bale al svol a nivel internazionâl.
◆ Fevelant cu la int di San Marc – ancje cjalant il fat che la Associazion Help Haiti di Sante Chiacosso e je nassude culì – si scuen domandâ di indulà che e rive tante passion pal sport.
◆ “Par solit – al conte Andrea Cecchini, che al è stât ciclist di zovin e, daspò, al è stât Sindic di Merêt – un al prove simpri a lâ daûr di cualchidun, in dutis lis ativitâts, sedi inte profession, sedi intal sport. A San Marc, o sin lâts ducj daûr di Franco Fioritto e Danilo Moretuzzo, che a son stâts i prins a otignî risultâts preseâts. Come che si dîs, Franco e Danilo a àn butât un clap te aghe e la reazion di dut il borc e je stade une vore positive. Ancjemò plui, si pues fevelâ forsit di câs, forsit di ocasions. Dut câs, intai paîs plui piçui chestis cumbinazions si rive a tirâlis sù tant miôr che intai paîs plui grancj. A San Marc o sin une piçule comunitât e o sin rivâts a gjoldi i risultâts ducj insiemi, imparant plui ae svelte ce che al covente par fâ ben lis robis, cu la condivision dai valôrs. Se propit si scuen dî il non di une persone che e à fat di cole par dut, o soi in dificoltât parcè che pardabon al è impussibil nomenânt dome un. Plui che une persone, o disarès che il teatri inte scuelute di San Marc al è stât il puest indulà che si sin simpri cjatâts adun: une cjase par dutis lis ativitâts dal paîs, de Pro Loco, e par fâ fieste”.
◆ “Intal 1964 – al ricuarde Franco Fioritto, forsit la vere dinamo de passion pal sport che si respire a San Marc – o ai tacât di frutut a cori in biciclete cu la Atala Libertas di Giovanni Casella. Jo o jeri un bon passist e o levi a cori intes garis di gnot, parcè che in scuadre o vevin un velocist bulo: finidis lis garis, mi molavin a Udin, passade miezegnot, e tal scûr o tornavi a cjase, cuntun pocje di sbigule. No ai corût cuissà trop, ancje parcè che in curt o ai tacât a lâ a vore, dut câs o pues listâ une lungje cariere di dirigjent sportîf, ancje a nivel talian”.
◆ “Di zovenut – al conte Danilo Moretuzzo –, o ai tacât cui Zûcs de Zoventût e o ai rivât a vinci alc fintremai che, sante scugne, o soi lât a vore. Compagn di Franco Fioritto o soi stât dirigjent, ancje a nivel regjonâl. Cumò, cu la Libertas di Sarsêt, o sin daûr a puartâ indenant il Zîr internazionâl de Regjon Friûl-Vignesie Julie par under 23. Dut câs, dut al è partît de passion nassude a San Marc”.
◆ “O ai molât di cori cuant che al jere timp di tacâ pardabon – al dîs Luca Cecchini, pari di Elena –. O vevi cuindis agns cuant che o soi lât a vore e no vevi timp di alenâmi. La mê passion e je stade mateâ cui zovins come alenadôr e, cul jessi tecnic de piste a San Zuan dal Nadison, o ai fate cetante esperience. Il merit par jessi tant cognossûts? La passion di ducj”.
◆”Festezâ un sucès tal mieç de mê comunitât e je simpri la robe plui biele – e pant Elena Cecchini, trê voltis campionesse taliane su strade, campionesse europeane e cuntun curriculum sportîf che le met dongje des miôr atletis talianis di simpri –. La int di San Marc mi à simpri poiade e sburtade une vore e, cuant che o molarai di cori, o pensi che o varai voie di lâ indenant cu la tradizion di mateâ cu lis plui zovinis. Chest an o ponti al Campionât talian cuintri il timp, in cjase a San Zuan dal Nadison, al Zîr di Italie e ai Campionâts Europeans e Mondiâi, prime di maridâmi cun Elia Viviani. Cetant impegn, dut câs al è biel cussì e no viôt la ore”.
◆”Danilo al è gno santul e o ai scugnût cori in biciclete – e ricuarde Tatiana Benedetti -: in chei timps, ancje une biciclete “Graziella” e jere avonde par divertîsi”.
◆ “A contâle dute – e sclarìs Silvia Cecchini, campionesse taliane di ciclisim su piste – i miei gjenitôrs mi àn zurât che, di frutute, mi àn fat mateâ in altris dissiplinis, cundut che jo no mi ricuardi nuie. Al è passât tant timp di cuant che o ai vinçût il titul a Montichiari, dut câs la comunitât di San Marc e la mê famee a son impuartantis par ricuardâ dut il biel che al è stât”.
◆ Insiemi cun ducj, al è just nomenâ ancje Enzo Uliana, Graziano Nigris, Giampietro Zucchiatti, Edi Cecchini, Daniele Cecchini, che vuê al lavore cu la Bora Hansgrohe intai professioniscj dal World Tour dal ciclisim, Nicola Cecchini, Lorenzo Nigris, vuê ricercjadôr sientific in Gjermanie, Mattia Nigris e ducj i frututs che a menin dilunc la tradizion di San Marc. ❚

::::::::::::::::::::::::::::::::::::::::::::::::::::::::::::::::::::::::::::::::::::::::::::::::

La associazion don Bosco: amicizie e agregazion
Un dai segrets dal sucès sportîf e no dome dal borc al è il spirt di stâ insiemi

I CAMPIONS DI SAN MARC SUL PALC DE SCUELE DE INFANZIE

Une clape cetant impuartante par San Marc e je la Associazion Don Bosco, nassude intal 1978 a Plasencis (che inte varietât di furlan dal puest le clamin Plasences) sot dal sburt dal salesian Edoardo Furlano. Tacant subite intai prins agns cul balon e cul ciclisim, tant che ativitâts di agregazion. Passant i agns, la ativitât de Don Bosco si è trasferide a San Marc, indulà che a àn tacât a meti adun iniziativis di ciclisim e no dome. La biciclete e je simpri stade il denominadôr comun di dute la ativitât de Associazion, che e à metût adun garis par zovins, zornadis a torzeonâ inte campagne, a lâ e tornâ indaûr di Madone di Mont, e corsis cuintri il timp. A San Marc si ricuardin ancjemò vuê lis esperiencis tes plui impuartantis Granfondo ator pe Italie, fintremai il viaç di Santiago, il troi celest, di Grau al mont Lussari, e la vie Francigena. La Associazion dal president Marco Bunello e à simpri pandude la voie di spartî passion e di vivi insiemi lis iniziativis plui bielis. ❚

::::::::::::::::::::::::::::::::::::::::::::::::::::::::::::::::::::::::::::::::::::::::::::::::

Di San Marc a Barcelone: le storie di Vanni Lauzana
L’olimpionic intal 1992: “Gno pari si è lamentât parcè che o soi rivât ultin”

Vanni Lauzana

No dome ciclisim a San Marc. Un dai atletis plui impuartants de storie dal Borc al è dal sigûr Vanni Lauzana, nazionâl di solevament di pês, che al è stât bon di cjapâ cuindis titui talians e une vore di risultâts ator pal mont.
◆”O ai tacât par câs – al conte Vanni -: gno barbe mi à puartât a Padier par une prove, che e je lade ben. O soi lât sù e jù a Udin ogni dì par agns, daspò molât di vore. O soi stât il prin sanmarchês a puartâ il non dal Borc ator, prime di Elena”.
◆ Vanni al è rivât al nivel plui alt aes Olimpiadis di Barcelone, intal 1992.
◆ “O ai puartât pardut la semplicitât e il spirt di sacrifici di San Marc. A Barcelone, a son rivâts a viodimi ancje mê mari e gno pari. Jo mi soi cualificât pe gare di finâl e o soi rivât ultin, di dodis di lôr. O jeri une vore content, parcè che jessi un dai miôr atletis dal mont e jere une sodisfazion par me. Dut câs, gno pari, insom de gare, mi à dite, fûr par fûr: “Orpo, Vanni… tu sês rivât dome ultin? O sin rivâts fin ca par vioditi: se o jeri jo, o fasevi miôr!” ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +