RIFLESSION – 4. Identitât e universalitât inte Bibie

4. La identitât
dal popul ebraic
inte Bibie
La Bibie je une racuelte di libris une vore stratificâts. Di fat, in tancj libris de Bibie si cjatin tocs scrits di personis diferentis in moments diferents. Che si pensi par esempli al libri di Isaie, scrit di trê profetis diferents: il Proto-Isaie (1-39) dal VIII secul p.C., il Deutero-Isaie (40-55), dal periodi di deportazion in Babilonie e il Tierç Isaie (56-66), scrit daspò la liberazion. Duncje, jenfri i libris de Bibie o cjatìn une vore di tensions identitariis, di separazion dal popul di Israêl di chei altris popui, e tensions universalistichis. Viodìn prime di dut lis tensions “identitariis” o di “separazion”.
Mi somee che la idee identitarie plui fuarte e sedi chê di vê pensât che il popul di Israêl al ves vût un rapuart speciâl cul Diu unic JHWH. Cheste e je une idee une vore arcaiche, che si cjate in cuasi ducj i popui dal mont, che a crodin di jessi intun rapuart particolâr cul centri di significât dal univiers. Ma a diference di tancj altris popui, cheste idee di un rapuart speciâl cun Diu e je ancjemò une vore vive intal judaisim dal dì di vuê.
In particolâr, Neemie (V secul p.C.) e Esdre (398 p.C.) a àn puartât indenant la idee che la leç di Israêl, scrite inte Torah, e fos il contrat che al leave par simpri Diu al so popul. Inte Torah, dongje de storie di une liberazion de sclavitût in Egjit, o si cjatìn libris indulà che si stabilìs cemût che al à di vivi il popul di Israêl. A son leçs che a stabilissin la sacralitât e la profanitât des situazions di vite, dai animâi e des robis. Di conseguence, a stabilissin cemût conservâ la purece e cemût gjavâ vie lis impuritâts. Cjalant chestis regulis cui vôi di vuê a samein il risultât di un pinsîr psicomagjic, cuntune vore di carateristichis nevrotichis.
A nivel pratic, Neemie e Esdre a àn scombatût une vore par tignî separade la identitât ebraiche di chei altris popui. A àn cirût di ricostruî la storie di Israêl metint dongje i libris de Bibie, cuntune struturazion che e podeve lâ avonde ben cu la lôr ideologjie. A àn cirût di proibî il matrimoni tra ebreus e no ebreus. A àn sostignût une linie di pinsîr indulà che ni la monarchie davidiche ni il templi a jerin centrâi, ma dome la adesion a la leç (Torah) e jere il fondament dal popul di Israêl. Une leç che midiant des normis di puritât e garantive la separazion dal popul di Israêl di dute chê altre int.
Lis lôr ideis identitariis a son stadis cjapadis sù dal judaisim daspò la distruzion dal secont Templi (70 d.C.), indulà che no esisteve plui ni la monarchie davidiche ni il Templi. Duncje, a la aristocrazie regâl e sacerdotâl a subentravin i rabins; ven a stâi mestris di orientament farisaic, che a continuavin a fevelâ l’ebraic e l’aramaic e che a àn continuât a insegnâ cemût vivi a la lûs de leç di Israêl (cemût mantignî la puritât tal mangjâ, intal preâ, tal maridâsi, nassi e murî).  (al va indevant) ■
Franc Fari – de Universitât dal Friûl