RICUARDI. Mandi Siôr Paian

Silvano Pagani nus à lassâts. Il timp al è pedoglôs e ancje i arbui che a somein eternâi, si sfantin. Par agnorums lui al è stât un che simpri al preseave cjacarâ cun chei che sbatevin la muse cu la cuistion furlane e che e cirivin di cjatâ un sisteme dret par fâle deventâ plui vivarose e sflandorose: politiche soredut, ma no dome.
Silvano Pagani al jere un spieli straordenari tal verzelât mont dai autonomists e dai friulanists: lui al cirive tai siei interlocutôrs dut il bon che a savevin dâ e mai lis diviersitâts buinis dome par slontanâ. Al jere simpri pront e ferbint tal cjapâ dentri int, plen di voie di confrontâsi e di resonâ. E al à continuât a resonâ fin tal ultin flât de sô vite, ancje se al jere malât, cun ducj chei che al veve tirât dentri te cuistion furlane fintremai dai timps di vie Baldissere.
Di dutis lis robis, un grum di robis masse lungjis di contâlis achì, fatis di Silvano, par me la plui impuartante e je stade la costruzion de sô radio Onde Furlane, la radio libare dai Furlans. La cooperative, vuê un imprest di fonde de culture furlane, lunc vie tal timp si è mudade e e je deventade planc a planc un puart sigûr par diviersis prolizions di Furlans seont dai interès di ognidun. Agnorums plens di vitis e di intrics. Silvano al cognosseve trop che e costave la dibisugne di sudôr par tirâ sù une cooperative, colaborâ cun pensadis e pretesis diviersis, riscjâ cu la sô muse e cui siei bêçs par ducj. I siei agns di Presidence e po dopo l’impegn tant che soci, une scuele fuarte di democrazie, a àn lassât une olme, che je un riferiment ancje pe vite di vuê.
Insom si à di visâsi di une robe impuartante di Silvano. Lui al à fat un implant, une fonde, che ancjemò e à di deventâ une scuele pal avignî. Tai agns 70-80 al jere lui, cuasi di bessôl, che tai impegns politics, cunvignis e dibatiments, dûr tant che un clap, al cjacarave dome par furlan, cun dut che i tontonavin cuintri juste par dispiet, par lui la lenghe e jere une identitât di no vendi par nissune reson. Vuê, ancje in gracie di agns di scombatiments e di cressite sientifiche e culturâl, nô furlans o vin cuistât il dirit di doprâ la lenghe furlane e o possedìn ducj i imprescj tecnics par fâlu. E sarès ore che i rapresentants istituzionâi dal Friûl, dulà che son sentâts, a tacâ dal Consei regjonâl, e po dopo tes provinciis e tai Comuns, a scomencin a doprâ simpri la lenghe furlane che e deventi l’imprest mestri par fevelâ di dut e cun ducj: tant che Silvano al à fat inte sô vite. ■
GIORGIO CAVALLO