“Cjare amie mê / o ai strenzût inte mês, / lis tôs mans / e tal gno cûr / che in chel moment / al lave a fonts / si è daviert un salustri / dulà che o soi rivât / a ricognossimi / cussì tu âs fat florî / cul to biel trat / lis mês naturalecis. / Il to biel ridi / lis tôs peraulis / e i motos / mi àn salvât / cence savêlu”.
◆ Daspò di Poesiis e Liendis de Tiere di Cjargne, Tumieç, 2000 (che La Patrie e à za vût presentât intal numar di Dicembar dal 2016), Renzo Balzan (1943-2016) al à fat il bis cun chest zimul jessût siet agns daspò dal prin. La struture e je simile: dodis poesiis e cinc liendis, scritis inte varietât furlane cjargnele, siore di peraulis sugjestivis e costruts preseôs. Par capî ben il libri si à di pensâ che Renzo al jere un furlan di planure che al à sielzût di lâ a vivi in mont. E cussì, intes poesiis, dongje di delicadis pineladis di amôr, si cjate ancje il bosc, il nevâl, il troi, vâl a dî un paisaç esteriôr che al riflet il paisaç interiôr dal om e de sô anime. Lis liendis a son contis a mieze strade jenfri narazion e dramatizazion teatrâl. Si à scuasi la impression che la cjase li che si davuelç la sene e sedi un palc e che il public al sedi li a spietâ i atôrs che a vegnin a recitâ la lôr part. E di fat veju che a rivin Pieri, Anute, Tadeo, Noni, Lene, Veline e v.i. I ambients a son simpri di fameis di Cjargne, cjamadis di lavôr, leadis aes tradizions e difidentis bande lis novitâts. E sì che nol jere propit dut aur nancje intes fameis di une volte: barufis fra om e femine, fradi e sûr, madone e brût, fîs che no àn timp di abadâ ai gjenitôrs o che a smirin di sistemâju intun ricovar. No podeve mancjâ la fantate che le cumbine gruesse, ma la mari, daspò di vêle cjapade a peraulatis, e cjate ancje la soluzion par meti a puest lis robis. Al è un mont che al tire i ultins flâts: la tiere e domande masse sacrifici e e rint pôc, la fabriche ti met inte sachete bêçs sigûrs che tu puedis ancje permetiti lis feriis, magari a Grau. La ultime conte e introdûs un alc di sospindût jenfri la realtât e la imagjinazion: in fin dai fats la Cjargne e je simpri stade ancje tiere di fadis. ❚
