Regjonalisim, cjaval di Troie dal pinsîr centralist

✽✽ Il regjonalisim al è un dai temis plui cjârs pe çampe taliane e al corispuint a une vision decentrade des funzions dal Stât centrâl. Plui dongje di nô tal timp si è zontât il “principi di sussidiarietât”, che se di une bande al vûl svicinâ plui che si pues ai citadins il davuelzisi de funzion publiche, di chê altre al marche il rûl fondamentâl dal ent teritoriâl superiôr. In curt, cui che vuê al fevele di regjonalisim al dinee il principi di fonde dal autonomisim, ven a stâi dal dirit dai popui al autoguvier. Clâr che si resone in tiermins teorics, ma ribati cualchi principi o, almancul, metiju su la taule tant che elements di confront rispiet a ce che al è daûr a capitâ inte politiche regjonâl, al pâr impuartant, oltri che un dovê.
✽✽ In sostance, cui che vuê al predicje par un protagonisim plui grant e diferent de Regjon Friûl–Vignesie Julie intal contest locâl e statâl nol fâs nuie altri che rinfrescjâ un model istituzionâl vecjo. Pensait dome ae restaurazion des Provinciis, là che une bisugne vere, une domande sacrisante di guvier di une aree slargjade, si mudarà inte corse ae poltrone pai amîs e parincj “trombonâts” in altris elezions.
✽✽ Dut chest, cence che nissun al vedi la olse di dî: “Cheste Regjon, par cemût che e je organizade, no va ben”. E si cjatin mil scusis par sghindâ la realtât. “No plâs la espression “Friûl storic”; “A Pordenone non si parla friulano!”; “E i Bisiachi dove li mettiamo?”; “Gorizia un vaso di coccio tra Udine e Trieste”. Udin? Magari che al ves cheste fuarce, ma cheste e je dome la ultime bale che al conte cui che al à vendût no dome la anime, ma ogni risorse de citât transalpine ae economie di Triest.
✽✽ Al torne a proponisi cun fuarce il probleme teritoriâl, là che il dualisim nol tocje Udin e Triest, ma il cjâf lûc regjonâl, i siei centris di podê, la sô classe dirigjente e il rest de regjon.
✽✽ Frontâ cheste cuistion cence la pôre di vignî calcolâts “passâts de storie”, al vûl dî rivendicâ une politiche coragjose, fûr dai schemis ideologjics e des strentis dai partîts.
✽✽ “Io sono Friuli Venezia Giulia” nol è ce che ur covente ai furlans. ❚