Referendum in Venit e Lombardie: la peraule pe Autonomie al Popul | Referendum intal Kurdistan irakian: 92,7% pal sì

Il 22 di Otubar in Lombardie e Venit si fasarà un referendum che al domande plui autonomie dal guvier centrâl. Organizâts dal president de Regjon Lombardie Roberto Maroni e di chel de Regjon Venit Luca Zaia, a vuelin domandâ ai citadins il permès di incressi lis competencis regjonâls cussì come che al proviôt l’articul 11 dal titul V de Costituzion taliane, che al da la pussibilitât di assegnâ aes regjons plui formis e cundizions pe autonomie.
Il test dal referendum dal Venit al cite: «Vuelistu che la Regjon dal Venit e vedi la pussibilitât di vê plui formis e cundizions pe autonomie?»; invezit chel de Lombardie: «Volêso che le Regjon Lombardie intal cuadri de unitât nazionâl, e scomenci iniziativis istituzionâls necessaris par domandâ al Stât di vê plui formis e cundizions pe autonomie, cun relativis risorsis, su la fonde e par efiet dal articul 116, tierç come de Costituzion?»
Pardabon, chel che al stâ par sucedi al somee a une operazion inutile dal pont di viste procedurâl e costituzionâl: i citadins di dutis e dôs lis regjons a laran a votâ par esprimi il lôr sintî che nol è vincolant, parcè che la decision finâl le cjaparà il parlament. Al è però evident che une domande di cheste fate, se compagnade di une fuart sburt popolâr, e podarès fâ cressi lis pussibilitâts des regjons di otignî ‘alc’. I doi referendums, duncje, no domandin la secession dal Venit e de Lombardie ma dome une plui grande autonomie (colegabile a chê legjislative, aministrative e finanziarie) cussì come che za a fasin lis regjons a Statût Special (Trentin-Sud Tirôl, Val d’Aoste, Sardegne, Sicilie e Friûl-Vignesie Julie).
In Lombardie, il scandai statistic nol à bisugne di quorum e nol è vincolant: la zonte regjonâl in cjarie – o chê che e vignarà elete tal 2018 – no je obleade a puartâ indenant la domande par vê plui autonomie. In Venit, invezit, a varan di partecipâ la maiorance di chei che a àn dirit, e la maiorance dai vôts e varà di jessi favorevule al cuesît.
Il sens de votazion al è duncje plui politic che altri, parcè che daspò l’esit pussibil al è che lis dôs regjons a vierzedin un negoziât cul Guvier che, se al ves di sierâsi in maniere positive, al podarès puartâ a une propueste di leç jenfri il Stât centrâl e la Regjon interessade par vê plui autonomie.
BOX
Referendum intal Kurdistan irakian: 92,7% pal sì
Che i curdis a vuelin la indipendence si sa di simpri, tant che ae fin de prime vuere mondiâl – finît l’Imperi Otoman – al è stât prometût un stât ae minorance curde. La promesse no je stade mai mantignude e i 40 milions di curdis a son dispierdûts in cuatri paîs: Irak, Iran, Sirie e Turchie. Complice la situazion instabile, intun di chescj, o ben l’Irak, Masud Barzani, president dal guvier regjonâl dal Kurdistan irakian in cjarie dal 2005, al à organizât un referendum su la indipendence. Al vôt dai 25 di Setembar i “sì” a son stâts il 92,7%, e la afluence fra i 5,3 milions di eletôrs regjistrâts e je stade dal 72,6%. Il guvier centrâl di Bagdad al à za fat savê di refudâ la ipotesi di negoziâ un distac. De Turchie, Erdogan al menace sanzions pesantis e salacor «ancje la opzion militâr». (Redazion)
SGRIFE (da mettere non alla fine ma tipo alla base della seconda colonna: deve essere un commentino a tutta la pagina, non il finale di un articolo).
Referendum in Catalogne, Venit, Lombardie, Kurdistan, e prime chel scozês e pe Brexit: plui o mancul contestâts, ma almancul la int e pues votâ. No come che al è stât in Friûl-Vignesie Julie pal referendum popolâr propositîf pes Provinciis Autonomis di Udin e Triest, refudât dal Ufici de Presidence dal Consei Regjonâl che si è esprimût contrari (25 vôts cuintri 20 favorevui). Par fortune che o sin sot dal guvier di un partît “Democratic”…