Racueltis di firmis popolârs, la storie

Vie pe storie resinte, e je stade plui di une racuelte di firmis popolârs, cun risultâts plui o mancul fortunâts.
La plui innomenade e je stade daspò dal 1976, dopo dal taramot. In chê volte, popolazion e istituzions di chenti si son mobilitadis par racuei lis firmis che a coventavin (almancul 50 mil) par une propueste di leç di iniziative popolâr par domandâ la nassite di une universitât in Friûl. Lis firmis a forin ben 125 mil. Il popul furlan al mostrave la volontât di scometi sul so futûr partint de formazion alte, de cognossince, dai zovins.
Par dîle cun pre Checo Placerean «il Friûl al à di saltâ fûr dal taramot cul cjâf e no pai pîts». Si à di dî che la Universitât dal Friûl e je nassude, ma no je propit un ferâl pe culture furlane, anzit…
Intal periodi 1981-1983 si fâs une petizion par presentâ une propueste di leç di tutele des trê minorancis dal Friûl, furlane, slovene e todescje. E fo promovude de sezion furlane de A.I.D.L.C.M., Associazion Internazionâl pe Difese des Lenghis e Culturis Menaçadis, cun prins firmataris Adrian Cescje, Samo Pahor e Max Pachner, todesc di Sapade/Plodn. Lis firmis tiradis dongje a forin 50.000, presentadis a Rome a Nilde Iotti. Une iniziative che e je coventade a meti un pont fer tes propuestis di leç in chel cjamp: e veve ancje une sezion gjenerâl che e podeve jessi buine par altris minorancis, e sburtave i parlamentârs a lavorâ.
La propueste par dâi une forme istituzionâl diferente ae Regjon no je gnove: intal Mai dal 1977 la conseire regjonâl dal Moviment Friûl, Cornelia Puppini, e presente une propueste di leç costituzionâl pe «istituzion de regjon Friûl a Statût speciâl e de regjon Vignesie Julie a Statût speciâl». Daûr di chel dibatit, intal 1984 si siere la racuelte di cartulinis-referendum, promovude di Onde Furlane, favorevulis ae istituzion di une Regjon Friûl: a ‘nd rivarin ben 93.541.
Une racuelte di firmis par vê une sede RAI a Udin e fo une gnove iniziative fate intal 1995-96. Il comitât promotôr al fo inviât da la Vita Cattolica di bonsignôr Duilio Corgnali.
Lis firmis tiradis sù par dut il Friûl a forin passe 54.000, consegnadis al President de Republiche di chê volte Scalfaro, che al disè che lis varès ziradis al president de Rai. Ma come che si viôt impiant il televisôr su Rai3 Regjonâl, clamade di chei dal comitât Tele Barcola, e je lade strucje. ❚
✒ Dree Venier