Sfuei Mensîl Furlan Indipendent
Archivi de Patrie

Program di protezion dai pintûts

Barbara Cinausero

A son 25 agns che la Austrie e scuint criminâi cun nons fals.
◆ Cartei de droghe, scuadris di sicaris, celulis teroristichis, mafie – lis organizazions criminâls a son une sfide in dut il mont –. Par che i tribunâi a rivin a meti in galere chei che a tegnin il cjaveç, a coventin provis che dispès dome i testemonis oculârs o i pintûts a puedin presentâ. Chescj personaçs a vegnin protezûts in Austrie za di 25 agns, tant che al conte il dirigjent de sezion pe protezion di testemonis e vitimis dal Ufici Criminâl Federâl. Il so non no si cjatilu in nissun organigram. Lui e i siei coleghis si dipuartin scuindûts e par chest lu clamarìn culì cul stranon di Eder.
◆ “Nô o stin daûr al aspiet operatîf de protezion dai testemonis e di chei di famee” al dîs, e al zonte che cui che al parten a cheste categorie al è in pericul une vore grant di paidî un atentât di bande des personis che al à rineât. Dispès la organizazion criminâl e met su di lôr fintremai une taie in bêçs. Ancje i testemonis a jerin part ative intes organizazions e a scomencin il program di protezion bielzà intant de detenzion. Eder al contint che al sedi un bon motîf chel di protezi chescj criminâi. Il reât che a àn fat al conte pôc in chest câs e ancje i sassins su comission a puedin jentrâ intal program: culì la morâl no jentre, si proferìs protezion e pussibilitât di redimisi.
◆ La strade par une gnove identitât pai interessâts e pes lôr fameis e scomence cu la creazion di une storie, al dîs Eder. Dutun cun lôr si cirin gnûfs nons, si invente un curriculum vitae che si podedi crodi e si lu fâs so. Al varà di jessi il plui dongje pussibil ae realtât, par che al sedi plui facil di memorizâ. Cun di plui, i “protets” a varan di jessi stabilizâts sedi dal pont di viste fisic, sedi psichic, par vie che a son sometûts a une pression fuarte. I testemonis a vegnin logâts cun nons fals in abitazions protezudis, si ur da documents gnûfs e jutori par meti adun la lôr gnove vite. Ancje dutis lis olmis digjitâls de lôr vite di prin a vegnin scanceladis cun atenzion di bande di esperts informatics dal dipartiment federâl. Di li indevant, cualsisei comunicazion cui parincj e pues jessi fate nome midiant dai responsabii federâi dal program di protezion. Un probleme particolâr al è chel dai frutats, che a son une vore estrôs intal scjinfâ lis normis feracinis di protezion e tal provâ a tornâ in contat cui vieris amîs midiant dai socials, videozûcs, internet bars. Ogni trasmission, ogni telefonade a vegnin controladis, dispès par agns. A son programs di protezion che a durin plui di dîs agns, par vie che il pericul al continue a lunc, ancje se la durade medie e je di cinc agns sù par jù. Tra i responsabii federâi e i lôr protets al à di instaurâsi un rapuart di fiducie assolude: cualsisei probleme dal protet al devente ancje un probleme dal protetôr; dut câs no si varessin di meti sù rapuarts di amicizie. Par cualchi testemoni il program al finìs ancje se a continuin a jessi in pericul, intal câs che a fasedin un reât di pueste o che a fasedin alc plui voltis cuintri la lôr cundizion di protezion. Di cuant che al è stât metût adun il dipartiment, il numar des personis che a àn vût acès al è di cualchi centenâr, ma no disin mai numars precîs, ni i coscj dal program e ancjemò mancul su câs specifics. I responsabii a nomenin nome – jenfri i câs che a àn vût sot man – i procès par terorisim cuintri doi de milizie teroristiche dal “stât islamic” e un procediment cuintri di un sicari, là che lis testemoneancis a àn vût part fondamentâl.
◆ L’80% dai testemonis sot protezion in Austrie no son citadins austriacs: fin cumò intal program a son jentrâts citadins di 26 stâts. La Austrie e je un stât piçul, là che al è une vore dificil rivâ a scuindi testemonis locâi – al dîs Eder – e alore chescj a vegnin dispès trasferîts in altris stâts, in graciis di cooperazions internazionâls di scambis mutuâi. Chei che a rivin dal forest a vegnin scuindûts intes grandis citâts, par vie che un arbul si plate miôr intal bosc e cussì al ven fat plui facil il lavôr dai responsabii de protezion, che a pandin che in 25 agns di lavôr a nissun dai lôr protets al sedi mai stât fat alc di mâl e nissun al è mai stât “cjatât”. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +