Dopo vê trionfât a Milan tal concorso “Fast – i giovani e le scienze”, doi progjets ideâts di fantats dal “Malignani” di Udin cu la poie de Fondazione Friuli, a àn partecipât a Dallas in Texas ae Isef, la plui grande fiere internazionâl di sience e inzegnerie, e in Ingletiere al London International Youth Science Forum (Liysf).
◆ Si trate dai progjets “Film biosostenibile, idrosolubile e antimicrobico derivato da scarti di agrumi” e “Il Micopec: il terreno di coltura ideale per i miceti”. Il prin, opare di Eleonora Culot, Lisa Pantanali e Edoardo Paron, al à prodiot une pelicule doprant i vanzums des scussis dai narants in maniere biodegradabil, tant che si podarès ancje doprâ intal setôr alimentâr.
◆ La seconde propueste, ideade di Eva Costantini, Angelo Sigalotti e Gabriele Zanutta, e à invezit puartât indevant la realizazion di un teren di colture par fâ cressi in laboratori microorganisims in mût une vore plui economic e svelt di chei che a vegnin doprâts cumò, e cundiplui cuntune atenzion fuarte ae sustignibilitât ambientâl.
◆ Ai students a son rivâts par chescj lôr sucès ancje i compliments dal president de Regjon Massimiliano Fedriga. ❚
Progjets inovatîfs dal Malignani a Dallas e a Londre
Redazion
