Progiet Bibliotechis: a stan par rivâ 11.150 gnûfs volums

A son numars che a fotografin no dome l’impegn de Fondazion Friûl a pro dal so teritori, ma ancje la ricjece culturâl che chest al esprim. Intal ambit dal Progjet Bibliotechis, inviât intal 1999, e dopo di chê fate tal 2022, di fat, si è daûr a fâ une gnove distribuzion di publicazions sostignudis dal ent e destinadis a struturis publichis e di agregazion sociâl. Si trate di 11.150 volums di tancj titui che a àn tant che teme il patrimoni storic e artistic, vicendis e testemoneancis, personaçs, lûcs e itineraris. A vêju in donazion in chescj dîs a son 167 bibliotechis, 116 scuelis e ancje 16 cjasis di polse des provinciis di Pordenon e di Udin, par un totâl di 299 direzions.
◆ “Cun cheste gnove operazion – al comente il president Bruno Malattia – intai 26 agns di chest progjet o rivarìn al numar di 375.638 volums di 2.200 titui dâts fûr a 299 sogjets dal teritori. E je une iniziative che la Fondazion Friûl e sosten cun convinzion parcè che e permet di valorizâ la editorie locâl e di stiçâ la fruizion des sôs oparis de bande dal numar plui alt pussibil di citadins di dutis lis etâts. Dut chest al è segnâl di une vivarosetât culturâl che no je simpri palesade cemût che al meretarès e che e rapresente une ricjece par dut il Friûl”.
◆ Tra i titui distribuîts, ancje tancj catalics di mostris, di chês metudis dongje a Dieç a chês ospitadis intai museus dal teritori, lis vuidis curtis e agjilis promovudis de Deputazion di Storie Patrie pal Friûl, che dal 2004 a vuê a àn permetût di ilustrâ plui di 100 edificis di significât particolâr presints sul teritori furlan, e cun di plui publicazions dedicadis ae storie di ogni ete ancje des nestris comunitâts plui piçulis. In cont dai destinataris, cun di plui, in passât i libris a son stâts consegnâts ancje tes cjasis circondariâls di Udin, Tumieç e Pordenon, e di cualchi an ancje aes cjasis di polse.
“O stin fasint une distribuzion che e je il plui pussibil smirade, selezionant tra i tancj titui a disposizion chei plui juscj pal lûc là che a saran consultâts e daûr de tipologjie dai frecuentadôrs, in maniere di fâ incrosâ il contignût de publicazion cul interès dai citadins” e à sierât Malattia. ❚