Pre Bepo Marchet, ‘Letaris ai furlans’, curadis e comentadis di Davide Turello, Udin, 2024

“Barbe Tite, no stêt vêsi par mâl se cheste volte, invezit di impuestâ la letare, le fâs stampâ sul sfuei. Cheste e je par vô e ancje par un grum di altris come vô: no ai timp di scrivint une parom, a ducj i contadins che o cognòs; e cussì mi è vignût il pinsîr di strucjâle sul gjornâl”.
◆ Si vierç cussì la prime di chestis vincj letaris che Marchet ur indrece ai furlans intai agns 1950 e ‘51. A jerin za stadis publicadis intal 2005 de bande de Clape Culturâl Aquilee. Cheste gnove edizion, par cure dal Comun di Glemone e de Clape di Culture “Patrie dal Friûl” e finanziade de ARLeF, e je insiorade des notis e dai coments di Davide Turello. Parcè lis notis e parcè par talian? Parcè che Marchet al dopre tantis peraulis che aromai a son ladis in dismentie e al covente un piçul jutori par chei si metin intal cjâf di lei par furlan (e no son tancj!).
Pre Bepo si plate daûr de firme di un Meni Parut, un dai tancj noms de plume che al à vûts doprâts par scrivi sul sfuei che al veve fondât parie cun Felix Marchi. E chest Parut al dâ fûr patafs cence remission: a un contadin, a un impleât, a une massarie, a un penarûl, a un scuelâr, a une mestre, a un compagn di naie, a un predi, a un de Filologjiche. Nol sparagne nissun, rivant ancje a jessi un tic sore la brucje, come cuant si lasse cjapâ de asse cuintri di meridionâi, forescj e feminis. Dut par une difese passionade de lenghe furlane, che sot de sô pene e nas vualive, sclete, biele, elegante. Duncje patafons a chei che si vergognin di doprâle, a chei che a talianotin a pampagal vie, a chei che le dispresein. La vis polemiche si fâs ancjemò plui ferbinte cuintri dal fassisim e dai nostalgjics di chei vincj agns di purcjineladis cui fruts inscuelâts a marcjâ tant che pipinots. E lui lu cognosseve ben il fassisim, che lu veve sospindût dal insegnament e parfin condanât al confin politic.
◆ I coments di Turello a son, se al è pussibil, ancjemò plui polemics des posizions di Marchet. Al strucje il dêt in plaiis tant che la contradizion clamorose dai autonomiscj che a van a finî in chel stes partît che al à fat e che al fâs di dut par boicotâ chel ninin che si rive a fâ in cont de lenghe furlane. O ben il Messaggero Veneto, che nol publiche plui la pagjine par furlan che la SFF i furnive za pronte, parcè che al pretindarès di jessi paiât par un tant! ❚