“Intune gjeografie leterarie ideâl de Europe de Ete di Mieç, la Patrie dal Friûl e je tal mieç di cetantis corintis che a incrosin lis lenghis romanzis cun chês gjermanichis. Tai prins agns dal Dusinte, la cort patriarcjâl e devente un lûc di poesie e di culture in gracie dal Patriarcje bavarês Wolfger di Erla (…) La culture e sflorìs vivarose ae cort dal Patriarcje”.
◆ Il catalic de mostre imbastide de Provincie di Udin dai 14 di Fevrâr ai 17 di Març dal 2013 al è un libri di novante pagjinis in formât 23,5 par 33,5. No un libri di lei in maniere sistematiche, ma di vierzi a câs, sigûrs di intopâsi in cualchi zoie di viodi o di lei! Viodìn: un struc de storie dai parlaments de Ete di Mieç e di chel de Patrie dal Friûl che al jere un dai plui avanzâts (pp.14-17); La floridure de poesie di cort che e interesse ancje la nestre tiere, cu lis primis composizions a fins estetics (Piruç myo doç inculurît e Bielo dumlo di valôr) e po cu lis lirichis di amôr di Josef Strassolt, Eusebi Stele e Ermes di Colorêt par rivâ a P. P. Pasolini e infin a Pierluigi Cappello (pp.18-25); la convenience di amôr cul imprenditôr cjargnel Jacopo Lisussio (34-39). Il gugjet, une sorte di cûr di metal o di stofe che lis feminis a poiavin sui flancs par no fâsi mâl biel che a gucjavin cu la cosse dal fen sù pe schene (p. 40). Si fasarà cognossince cun Felicita Sartori, une artiste furlane che pôcs a san alc di jê (42-45). Une scorsade svelte ma complete su la piture in Friûl (no dome Tiepolo e Quaglio!) (48-57). E po la contesse contadine Caterine Percude (pp.60-66) e Pieri Savorgnan di Brazzà (68-69). Lis bussadis furlanis di Luîs Salvadôr di Asburc Lorene (78-79) e lis vilotis (80-82). La perle forsit plui preziose e je la storie di Juliete e Romeu che la sô lidrîs e podarès propit jessi in chê dolce amistà di Luigi Da Porto par Lucine Savorgnan (28-33). No par nuie la mostre e je stade inmaneade in acuardi cul Comun di Verone.
Dutis lis fotografiis a son un plasê pai voi, sedi chês des oparis che za o cognossìn, sedi chês di artiscj e di artistis dal dì di vuê.
Ducj i tescj a son in cuatri lenghis: talian, furlan, inglês e todesc. E se si à voie di une ridade, la ultime pagjine, chê prime de cuviertine, e je li a pueste par chel. ❚
