LA STORIE – La ultime fevelade dal patriarcje Volchîr

Cividât, ai 15 di Zenâr dal 1218. “Al domande di fevelâ sâr Tomasin di Cerclarie.” “Fasilu jentrâ”,  al comande dal jet il patriarcje Volchîr di Erla, vieli e malât. Il famôs poete furlan al jentre te grande cjamare scure, si inzenogle dongje dal jet e al busse l’anel dal patriarcje. “Pari riverît, cemût staiso?”
◆ “Tomasin, amì fidât, ti ai agrât di cheste visite. O soi ae fin de mê vite… Dut ce che mi reste al è tes mans dal Signôr.” “O speri alore che il Signôr us lassi ancjemò a dilunc pal ben de Patrie.” “Ce che o podevi fâ pe Patrie lu ai fat. Aromai no ai plui la fuarce che o vevi. Ah, trop che o ai corût! Mi impensi di jessi stât fintremai ae crosade, fin sot des muris di Jerusalem. E cetant che o ai corût par dute la Europe! Mi impensi ancjemò di trop che o ai sfadiât par fâ di sensâr jenfri l’imperadôr e la Ingletiere e par liberâ il re Ricart Cûr di Lion, che il cont di Gurize al veve fat presonîr tal bosc di Cjarlins.”
◆ “Chest, Pari riverît, cuant che o jeris vescul di Passau. Ma di patriarcje di Aquilee o vês scjapinât ancjemò di plui, in Patrie e ator pal mont.” “Sâstu, Tomasin – al tache a contâ il vieli Volchîr cuntun fîl di vôs – o vevi la fiducie dal imperadôr che mi veve nomenât so legât in Italie, e la fiducie dal pape che mi veve nomenât so legât in Gjermanie. Dut un cori là che al coventave, des fumatis di Nurberc al soreli di Rome. E nol è stât facil jessi ni vuelf ni ghibelin! Ma dome cussì o ai rivât a meti pâs pardut là che mi mandavin. O ai rivât alore a comedâ la cuistion di Magonce, o ai fât zurâ fedeltât ae citât di Siene che dopo, ogni volte che o levi là, mi àn simpri dât bon acet. O ai fat di mediatôr tra l’imperadôr Liopolt V e il pape Celestin III. E je stade dure, ma o ai rivât a tirâ ae fedeltât ancje lis citâts di Pavie e Piacence, e dopo Milan, Cremone e Bresse.”
◆ “Cun vô – al zonte Tomasin – il Patriarcje di Aquilee al è deventât il protagonist, juste tal mieç  tra il papât e l’imperi. E par dut ce che o vês fat, o ves vudis ricompensis une vore grandis e dutis par incressi il Patriarcjât e il Friûl. A soreli a mont, la Patrie cumò e rive ae Plâf e e à fintremai il cjistiel di Monseliç; a soreli jevât, o ves recuperade la Istrie.” “Eh sì po – al sbroche il patriarcje Volchîr – o soi lât jo dal imperadôr Oton cul diplome che Indrì IV al veve dât al patriarcje Siart, par fâmal confermâ. E di corse dopo in Istrie, a pretindi i dirits dal patriarcjât! O ai cjatade une mediazion cui comuns istrians e ancje cun Vignesie, che di agnorums e jere cuintri. O ai cjatât fûr il pont debil dai venezians e ur ai fevelât te orele juste. Cuant che si sa tratâ, si cjate simpri une soluzion, cence fâ vuere.” E Tomasin: “La Patrie dal Friûl no je mai stade tant grande, rispietade e autorevule come vuê, in gracie de vuestre vore continue.”
◆ “Tu sês masse zentîl cun me, Tomasin. Par cont gno, dut a laude dal Signôr. Ma tu, scrivistu? ” “O ven cumò de Badie di Mueç, là che a son daûr a copiâ il gno “Ospit latin” che il so titul al sarès “Der Welsche Gast”, che a son cuindis mil viers par todesc.” “Brâf! Ce che mi plâs al è che tu tu sês furlan, jo todesc, e achì in Friûl o podìn fevelâsi e scrivi par furlan, par todesc, par latin e ancje par provençâl!”
◆ “Al è merit vuestri. Jo, Pari riverît, no soi achì par fâus compliments a vô tant che om di stât, patriarcje e princip potent e inteligjent, che ducj a san. Se in Friûl cumò o vin benstâ al è propit pe vuestre abilitât tes relazions cul forest e ancje parcè che o vês metût a puest i conts, lis tassis, la economie e soredut il dirit, che ducj nus invidiin. In gracie dai vuestris amîs banchîrs che o vês clamât di Siene, o vin ancje dulà domandâ bêçs a prestit. Ma jo invezit o soi achì par ringraciâus par vê dât acet, ae vuestre cort, a un puar poete come me e a tancj oms di culture e di art. Cividât e je deventade une lûs de poesie e dal savê. Come cun me, o vês dât acet e protezion al grant poete Walther von der Vogelweide, al preseât Boncompagn di Signe, che al à ancje recitât par nô. E al nomenât Wolfram von Eschenbach che al à scrit il Parzival, e ancje a Albrecht von Johannsdorf che nissun al sa cjantâ l’amôr e lis crosadis come lui! A Passau a son ancjemò che a vain parcè che dute cheste int studiade, e ancje l’autôr dal Cjant dai Nibeluncs, a son vignûts vie cun vô in Friûl!”
◆ “Mi visi Tomasin – al fas bocje di ridi il patriarcje – chê volte che o soi lât a Viene cun Walther Vogelweide. Ce gran poete! Ma al bateve i dincj di frêt e i ai dât cinc bêçs grues par che al ledi a comprâsi une pelice… Ce biei ricuarts – al suspire cence plui vôs – ma cumò o soi strac.” “Us saludi, Pari riverît. Daitmi la vuestre benedizion.” Inzenoglât, Tomasin di Cerclarie al pense dentri di se: “Cheste e sarà la ultime benedizion che o varai di chest grant om che al è daûr a studâsi. Wolfger von Erla al è pardabon un grant patriarcje, massime un grant om di culture e di pâs, propit chel che al covente pal avignî dal gno Friûl.” ❚