I PROTAGONISCJ – Al jere fradilastri dal imperadôr Carli IV

Nicolau di Lussemburc (Praghe, 1322 – Belum, 1358) al è patriarcje di Aquilee par 7 agns dal 1350 al 1358. Al è fi ilegjitim di Zuan re di Boemie e fradilastri dal imperadôr Carli IV. Il so stîl al mostre cemût il podê patriarcjâl al podeve jessi doprât in mût ambigui. Al declare, imprin, di volê cjastiâ i sassins dal predecessôr Beltram ma cheste intenzion, preseade dal popul, massime di Udin, e plate la volontât di fâ fûr chei che a jerin cuintri di lui. Un rimpin clâr par eliminâ ancje personis che no jentravin gran te conzure. Al contrari, a vegnin sparagnadis juste lis fameis plui cjapadis dentri, come i conts di Gurize che a jerin i mandants, e i Spilimberc, propit chei che ancjemò in dì di vuê a vegnin clamâts “beltramins” par vê copât Beltram. Forsit ancje par cheste repression une vore violente, tai siei timps nol piturât gran ben. A disin che al jere piçul, sec, piel e vues, ruspiôs. Une brute ciere, une vualmade disdegnose adun cuntune bocje di ridi enigmatiche. A somein i segn di une malatie e no par nuie al mûr a dome 36 agns. Dut câs, la sô azion di polizie interne e met a puest la organizazion dal patriarcjât e, in gracie ancje de fuarce dal fradi imperadôr, al rive a recuperâ une vore di citâts e vilis ae Patrie. Al rive ancje a tignî di voli e a fâi sbassâ lis alis ai potents confinants: i conts di Gurize, i Ausburc e Vignesie. Par afiet, al regale al fradi imperadôr un toc dal antîc “Vanzeli di S. Marc” che al è ancjemò a Praghe. Simpri dal fradi Carli IV al oten il diplome di fondazion tal 1353 di un Studium, ven a stâi di une universitât di art e di dirit a Cividât. Tai ultins agns si tignive lontan dal Friûl e al viveve o sierât a Sofumberc o a Belum, dulà che al è muart. ❚
D.N.