Par savê dal prin cristianisim di Aquilee vino di lâ in Pulie?

Il mai avonde nomenât pre Gjilbert Pressac al diseve che il messaç di Crist te nestre zone al jere di divignince judaiche e al vignive di Alessandrie di Egjit, puartât a Aquilee dai Terapeuts di Marc. In chei prins secui de nestre ete, duncje, al jere un colegament une vore fuart jenfri Aquilee, grant puart te part plui a Nord dal Mediterani, e Alessandrie, nomenade metropoli dal Sudest dal ‘Mare Nostrum”. Lis nâfs e i barcjons tai lôr cumierçs a metevin un dôs setemanis par colegâ lis dôs citâts. E dilunc chês rotis e passave marcjanzie ma ancje ideis. Ancje religjosis. E pre Gjilbert al diseve che dilunc des dôs spuindis dal Adriatic, e soredut in Pulie, si podevin cjatâ ancjemò ore presint olmis di chestis pratichis spirituâls comunis, soredut te musiche, e duncje al constatave che la Taranta no jere propit cussì lontane de Furlane.
◆ Po ben, la Regjon Pulie, stiçade di chescj studis di pre Gjilbert, e à pensât ben di puartâ indenant chê sô vore e e à finanziât la Universitât di Milan, midiant dal Conservatori di Lecce, cun 300 mil euros in trê agns, propit par continuâ il filon di ricercje cussì ben vualmât dal predi di Turide.
◆ E duncje in Pulie si studie la Aquilee cristiane! E inte Regjon Friûl – Vignesie Julie? Nuie! Aquilee e ven clamade in cause dome come la avanvuardie tal Nordest de grande civiltât romane o ben tant che cimitieri dai erois di dulà che al è partît il milite ignoto, par jessi sepulît tal altâr de patrie a Rome. Vonde!
◆ Di Ermacore e di Cromazi nuie. Dal Pastôr di Erma e dal Credo di Rufino nuie. Dal Patriarcjât e dal schisme dai Trê Cjapitui nuie. Tabù!
◆ Pussibil che la Regjon F-VJ no meti un franc par studiâ chest Unicum?, Pussibil che la Fondazion di Aquilee o chê de Basiliche o i dipartiments di Storie des universitâts regjonâls, magari colaborant cul ateneu di Milan, no si interessin piç di chestis cuistions, scuviertis e studiadis, fûr de academie, di pre Gjelmo Biasutti, di pre Gjilbert, di Renato Jacumin, di Remo Cacitti. Ce isal che al bloche?
◆ In chê volte Aquilee e jere tal cûr de Europe, centri propulsîf di ideis e fonde dal pinsîr ocidentâl. Robis discognossudis chi di nô, che vuê, fasint bon il sproc “Distinguersi per non estinguersi” di Jeremi Rifkin, o podaressin almancul doprâ par infuartî la identitât intun mont globalizât e vualivât che nus fâs pierdi ogni dì di plui la nestre fisionomie.
◆ E invezit un cidinôr, che no si rive a capî se al è une precise volontât contrarie o, piês, dome rude ignorance. Intant che o spietìn une rispueste, prenotin un viaç te penisule salentine… ❚