Par Andreotti il nestri Friûl al jere dome “confin orientâl”

Un titul dai giornâi al à scrit “Cun Andreotti a muerin 94 agns di segrets”. Nancje che al ves scomencjât la sô vite politiche cuant che inmò al mangjave di tete. Ma o sin li dongje. Su di lui a àn dit sù di dut e dal sigûr te sô posizion di podê e di fuarce tantis a ‘nd à cumbinadis. Cualchidun al dis che e sarà la storie a judicâlu, ma jo o crôt che no si scuen spietâ tant par savê che al jere un om dai americans, cence scrupui tal movisi e che par lui al valeve soredut il fin che al justifiche il mieç. Amen. Al sarà lui a viodise cul Signôr, a noaltris nus tocje invezit cjalâ i fats. E chei, pai furlans e pal Friûl a cjacarin une vore clâr. Nol è stât un nestri amì, ancje se cumò i nestris sorestans a son ducj lì a fevelâ ben di lui.
Prin parcè che te situazion internazionâl il so voli al colave simpri su la cuistion di Triest e se chest, di un pont di viste ideologjic, militâr e di aleancis, al podeve jessi capît finide la vuere cu la Jugoslavie di Tito che al smicjave masse di ca dal confin, une volte passade la buriana, cu la svolte ocidentâl e neutraliste di Belgrât, viodi ancjemò un pericul sul confin al sunave ridicul. Ancje parcè che cheste vision e à puartât a une presince di servitûts militârs in Friûl che a àn blocât il nestri disvilup par plui di vincj agns.
No dome: cul esercit si meteve adun il miôr, anzit il piês, dai servizis segrets: se Gladio e je nassude chi, partint de brigade partesane Osôf, po dopo e je deventade une altre robe, un imprest teroristic doprât dai fasciscj pe lôr stategjie de tension. E le vin paiade cjare: visaitsi di Petean. Ancje di chest o vin di “ringraziâlu”.
Ma soredut, disìnle fin insom, a Andreotti no i son mai plasudis lis minorancis. Lis pensave tant che un pericul pal stât. Ancjemò di plui sul confin orientâl, pal discors di prime. E al rivà a fâ di dut ancje tai agns ’90 cuintri de idee di Biasutti di meti sù Alpe Adria, cun Slovenie e Carinzie.
Ultime robe: il taramot. No tant pe contestazion de int des tendopolis chê volte de sô visite: lui o un altri al sarès stât compagn. Ben piês e je sarès stade chê di sierâ la esperience dal comissari straordenari nancje dopo cualchi mes. Se no fos stade la scosse di Setambar, il so guvier nol varès tornât a nomenâlu. Ma i faseve pôre la mobilitazion de int. Recuie, ma cence nissun displasê.
Dree Valcic