PAGJINE TECNOLOGJICHE. La piçule buteghe dai splendôrs

Se o sês letôrs plui o mancul fis di cheste riviste o savês dut dai problemis che à vût e e va indenant a vê Ondefurlane, la radio libare dai furlans. La nestre tiere e je siore di aghis, ma cheste storiche e impuartante anime dal Friûl e patìs sêt di masse timp, stant che i farcs “tipicamente antifriulani” de politiche a van indenant a suiâi la falde secjanti il poç.
Parcè farcs? Parcè che dome di une bestie che e vîf sot tiere doprant pôc i voi e la uldide si rivarès a capî la mancjance dal just ricognossiment a cheste fabriche di vite musicâl e culturâl. Pe falis dal servizi public (in chest câs radiofonic), chei dai 90.0Mhz si cjatin a fâ il lavôr tal so puest, metint in onde une informazion di cualitât, fate di radiogjornâi e altris trasmissions che a cuvierzin une schirie di setôrs diferenta, deventant an par an un archivi simpri plui siôr di storie furlane. Su www.ondefurlane.eu si cjate dut.
Al è par chest che ancje tal 2012 Onde Furlane e à fat la fieste/conciert Viva Onde Furlane a Cjasielis, dongje Mortean. Pe situazion finanziarie de radio e je une sorte di danze de ploie (come Scjaraçule maraçule!).
Dut câs, si pues fâ di plui che lâ a un conciert par judâ la clape de cooperative di cheste vôs tal etere, stant che la etichete de radio Musiche Furlane Fuarte, adun cuntune altre, ven a stâi ReddArmy, a àn viert un bancut sul marcjât di Internet.
Lait a sgarfâ il sît musichefurlanefuarte.bandcamp.com par cjatâ une cerce di albums di cjantants e grups di une vore di gjenars difarents, ducj però che a fasin musiche par furlan.
Si puedin scoltâ lis cjançons sore nuie e po dopo ancje discjamâlis in formât digjitâl a un presit no a bon marcjât…di plui! Ce sono 2€ par un cd?
Si va dal bart Loris Vescul al rap made in Cjargne di Dek Ill Ceesa, des poesiis in musiche di Lussie di Uanis al rock dai Jonokognòs (secont puest al festival di musiche in lenghe minoritarie SUNS 2012).
Buinis rispuestis e esemplis di ce che al ven fûr di une identitât vive e al pas cui timps, che no vûl limitâsi al folclôr e a lis vitrinis di un museu des speciis estintis. ■
Michele Calligaris