Pachyderm a Tumieç: breis artigjanâls su ruedis

Une volte si diseve nol è un mâl che nol sedi un ben. La crisi economiche e à lassât un grum di personis cence lavôr: une ocasion par tancj par dedicâ il propri timp aes passions. E chest al è ce che al è sucedût a Emanuele Damiani, zovin di Tumieç. “Di simpri mi sarès plasût dedicâmi a costruzion di taulis, tant cu lis ruedis par lâ su strade, che cence ruedis par lâ su pe nêf o su pe aghe. Une volte pierdût il lavôr par colpe de crisi, o ai aprofitât dal timp par studiâ i procediments, par recuperâ lis materiis primis e par fâmi une piçule presse. Dopo o ai tacât a fâ i prototips des taulis cu lis ruedis che cumò a son in produzion te piçule aziende di famee.” E je stade une vere scomesse par Emanuele. Nol è sempliç rivâ adore a fâ un prodot artesanâl e che al vedi lis carateristichis similis a chês des taulis origjinâls fatis in Americhe. La prime dificoltât e je chê di cjatâ il len just. La Pachyderm, le dite che e prodûs lis taulis, e dopre len di fau parcè che al è un len dûr e resistent ai bots e cu li stessis carateristichis dal aiar canadês. Ai diviers strâts di len a vegnin incolâts ancje tessûts tecnics (fibris di carboni, di cjanaipe) che a coventin par vê un prodot finâl lisêr e resistent; cun di plui lis taulis si podin personalizâ cu la grafiche che si vûl. La Pachyderm e je cognossude ancje par vê inventât une gnove tecniche di stampe grafiche che e permet di stampâ cualsisedi grafiche cun alte cualitât fotografiche, cun caraterichis antisgrifignade al presi di un panin.
“In chest moment – al conte Emanuele – lis taulis cjargnelis si stan fasint cognossi no dome in Italie ma ancje in Europe in particolâr grazie ai skaters che o supuartìn. Il prodot si fâs notâ pal nivel cualitatîf: i doprìn dai bogns materiâi e il len di miôr cualitât. Purtrop in zone no si rive a reperî nissune des materiis primis. Il vêr probleme che o vin vût al è stât chel di otignî un bon prodot e di fâlu cognossi al public dal setôr di nicje estremamenti conservadôr. A cui che al vûl inviâ une gnove ativitât i consei prin di dut di insiorâsi di competence par rivâ a realizâ un propri progjet o une idee, cence fâsi limitâ di condizionaments sociâi o economics. Di chi si pues partî cuntune ativitât o poiâsi a realtâts za presintis sul teritori.”
Duncje nuie al ven par câs e Emanuele Damiani cu la sô piçule fabriche Pachyderm al à dimostrât che in Cjargne si pues inmò pensâ di restâ a vivi e a lavorâ, fasint cognossi cheste piçule tiere ator pal mont.
Cui che al à gust di savê di plui in cont a breesuruede al pues passonâ tal sît www.pachyderm-skateboards.it/, o mandâ une mail ae direzion pachydermsk8@hotmail.it. ❚
✒ M.V.