A Cjassà un conciert al memoree
la storie dal côr che e va indenant
E jere finide di pôc la seconde Grande Vuere, cul Friûl dut di tornâ a fâ sù tant par fûr che par dentri, cuant che il mestri Luigi Garzoni di Adorgnano al decît di fondâ il côr “I Cantori del Friuli”, metint dongje feminis e oms, grancj e piçui, tancj zovins, cu la voie di cjantâ. La steme de corâl, dissegnade di lui, e recitave, e e recite inmò cumò, cjapant ispirazion di une famose cjantose: “E jo cjanti solamentri che par consolâmi me”. Tal fondâl il cjistiel di Udin, sore une stele, sot il fûc, e dulintor un cjavedâl, a ricuardâ il fogolâr. Ben, chê corâl, chel trop di vôs, a esistin ancjemò e chest an a memorein otante agns di storie. Il prossim lôr conciert al sarà a Cjassà, là che il mestri Garzoni al à passât i siei ultins agns di vite, là che al à tant insegnât, e là che cumò al è il museu permanent dedicât alui: “Museu Luigi Garzoni, il cjantôr dal Friûl”. L’apontament al è fissât par sabide ai 11 di Otubar tal Centri Civic Comunâl, in vie Division Julie, sot la direzion di Francesco Zorzini che dal 2007 al dirêç la corâl cun competence e sintiment, ben cussient de impuartance che e à vût e che e à ancje vuê cheste realtât, cul so president Gianfranco Ioan che cun altruisim e dedizion si impegne a tignîle vive e ative.
◆ Inte formazion e je inmò presinte la coriste Renata Macoritti che e je cressude cjantant sot de direzion e i insegnaments dal mestri Garzoni. Tal documentari dedicât “Luigi Garzoni, l’om, l’artist, l’inteletuâl”, che cui che al scrîf al à vût l’onôr di curâ insiemi al museu permanent, e conte di tantis esperiencis che le àn segnade in sens positîf, sedi dal pont artistic che uman, condividint tantis cjantadis, concierts, trasfiertis ator par dut il Friûl, la Italie e tal forest. A son cirche votcent i concierts che a àn fat i coriscj storics sot la direzion di Garzoni, vincint tancj premis a nivel talian e internazionâl, rapresentant il Friûl e la Italie in Austrie, Gjermanie, Paîs Bas e France. Tal sît museogarzoni.it, te pagjine dedicade al mestri, si puedin scoltâ regjistrazions storichis da “I Cantori del Friuli” fatis di bande dal Ent Friûl tal Mont, che nus dan la essence vive di un mût di cjantâ dut furlan che, gracie aes ativitâts e aes tantis provis che la formazion (sigûr rinovade cun gnûfs elements rispiet al passât, parcè che tancj, al è clâr, a son passâts a miôr vite) inmò cumò e puarte indevant.
◆ Il mestri Garzoni i tignive a dî: «Plui planc si cjante, e miôr si cjante. Come che e dîs la vilote: ‘Un cjant a fîl di lavris al è il sium di ducj i amôrs, al è come la rosade che da la vite ai flôrs’”. Ancje Zorzini i ten a chescj conseis e, clâr, al repertori che al viôt la presince, oltri aes oparis corâls di Garzoni, ancje dai cjants de tradizion, chês vilotis che tantis voltis il stes Garzoni al lave a cjapâ sù de vôs vive dai furlans. Ogni conciert une fieste, ogni fieste un conciert, sedi tai lûcs plui rapresentatîfs, come placis, sedis istituzionâls, teatris, lûcs sacris, sedi intes sagris, sui prâts, tes ostariis, simpri tra la int. Oris di cjantadis, cence mai stracâsi, privilegjant la lenghe furlane cun cualchi incursion tal talian, tal latin e tal graisan, stant che Garzoni al à musicât diviersis poesiis di Biagio Marin, e ancje tal veronês, stant che il mestri al à dât lis melodiis a tancj viers di Giacomo Muraro.
◆ Cu la muart di chel che al è stât definît l’ultin cjantôr de civiltât contadine, tal 1972, il côr al à subît une batude di arest e si è fermât. Ma vot agns dopo, biadelore, al è tornât a nassi, graciis ae fusion cu la corâl “Arturo Zardini”, un altri non di grant rivuart tal panorame culturâl furlan. E su chestis dôs figuris imponentis inte lôr semplicitât di amants de musiche, de tradizion, ma ancje inovadôrs daûr des lôr poetichis personâls te composizion, la storie e continue e cun lôr la voie di sintî e di cjantâ. Nin a scoltâ i “Cantori del Friuli” alore, cence dismenteâ di dulà che o vignìn, cirint di capî insiemi indulà che o vin intenzion di lâ. La musiche, la nestre musiche, e je buine inmò vuê, tal disastri di une contemporaneitât che e fas dut un tra sunôrs e rumôrs, di mostrânus la strade de armonie, par dentri e par fûr di nô. ❚
