Oh ce biel cjistiel… a Milan

Enoteca «Al Bistrò». Centri di Milan, juste in bande dal Tribunâl a pôcs pas dal Domo. I milanês che a son passâts par là chê Sabide doposmisdì di Novembar a àn cjatât une sene strambe. In font al locâl une bandiere cu la aquile, tais di Pinot grîs e Refosc, scarpets e suns forescj. Un grup di persosis, etâts, storiis e mistîrs une vore diferents, ma cuntune robe in comun: a son i furlans a Milan. E cun lôr cheste volte – pe prime volte – e jere ancje la Patrie dal Friûl. In ocasion des «Setemanis de culture furlane» organizadis come ogni an dal Fogolâr Furlan di Milan (www.fogolarmilano.it), un dai plui vecjos e vivarôs pes iniziativis, il nestri gjornâl al fat il so debut intal cjâflûc lombart, grazie al benvignût che nus àn dât Alessandro Secco, president dal Fogolâr e Marco Rossi, segretari. A presentâ la nestre biele Patrie, i progjets, lis dificoltâts e lis sfidis pal avignî, a jerin il diretôr Dree Valcic, il conseîr de associazion omonime editore de riviste Christian Romanini, vignûts pe ocasion di Udin, e Dree Venier, che al vîf a Milan, tant che altris nestris doi colaboradôrs, Natascia Gargano e Pier Antonio Zanini, presints in sale. O vin contât ai amîs de comunitât furlane in citât la storie di chestis pagjins, e la lôr nassite particolâr aromai 67 agns inadaûr par volontât di un “anarchic pericolôs” (Felix Marchi) – come che lu vevin segnât tal Caselari politic central di chei agns – e di un predi (pre Josef Marchet); dal insegnament di cui che al è stât e de sô ereditât, dal rignuviment dal gjornâl e infin dai tais e dal gnûf formât. Cun nô, emozionant sedi par cui che lu cognossût di persone sedi par cui che lu à dome sintût a nomenâ, al jere ancje pre Toni Beline, che o vin scoltât intun estrat dal dvd «La fabriche dai predis» (Patrie dal Friûl, Glesie Furlane e VTC). Daspò de teorie, o sin passâts ae pratiche cuntune degustazion di prodots furlans rivâts drets dal ‘Ducato dei vini friulani’ insiemit cul so president Piero Villotta e une coriere di int dal Friûl. La Patrie par dîle dute e à un leam speciâl cu la citât de “Madunina”. Pre Josef Marchet, par esempli, si è laureât a Milan ae Catoliche cuntune tesi sul volgâr di Glemone intal 1935. Il nestri Dree Venier dal 2007 al 2009 al faseve il diretôr di Milan, il progjet grafic e la impagjinazion e je fate inmò vuê li dal studi dal udinês Pieri Zanini e ancje Natascia Gargano e scrîf la sô rubriche musicâl e chei altris siei articui de citât lombarde. Insome ancje in trasferte si sin sintutûs un pôc a cjase. E alore mandi Milan, si viodin ae prossime! ❚
✒ Redazion