Novitâts sanitariis a Damâr. Si scree un centri radiologjic privât

“La idee e je di un privât – al conte Paolo Cucchiaro, President dal Cosint – che al à domandât un spazi in locazion par realizâ un centri radiologjic. Il Cosint, esaminade la richieste e viodût che la iniziative e jere compatibile cu lis normis urbanistichis de zone D1 di Damâr, tignint cont dal gjenar di servizi pe popolazion e considerât il discors ocupazionâl che a plen funzionament al rivarà a 15 unitâts, al à decidût di dâi in locazion un locâl. Cheste sielte e je za stade fate cun altris ativitâts (intai imobii dal consorzi si contin cirche 550 unitâts lavorativis). La ativitât e varès di partî in Primevere; a vuê, cui che al propon la iniziative al è daûr a completâ i locâi otignûts al grês (riscjaldament, iluminazion, servizis e v.i.).
Cun ogni probabilitât, il privât al cirarà di cjatâ une colaborazion cu la Aziende Sanitarie n. 3 indulà che al moment, par chel che al rivuarde i esams diagnostics di risonance magnetiche totâl (Total Body), si dopre un servizi mobil che al compuarte timps luncs di spiete. Di tant timp la popolazion cjargnele e spiete che la ASS 3 si indoti finalmentri di une struture fisse. Il probleme al è propit achì. Une tindince di pinsîr e puarte a considerâ la realizazion de risonance privade – che e à prin di dut di jessi autorizade de Regjon e dopo e pues vê une convenzion cu la aziende sanitarie – tant che la muart de risonance publiche: pinsîr legjitim ma seontri me no coret. Personalmentri, o pensi che tal moment che si rivàs a vê dutis dôs lis struturis, si miorarès il servizi, sigurementri cuntune riduzion dai timps di spiete e – parcè no – ancje dai coscj. Conferme di chest e podarès vignî de stesse Direzion de Aziende Sanitarie.”
O vin sintude ancje la dotore Cristiana Gallizia che nus à fat chest resonament: “Tra Cjargne, Glemonàs e Tarvisian o sin plui di 70 mil abitants. Ogni an a ’nt pierdìn cirche 400 (mortalitât di popolazion aromai anziane, sbassâsi des nassitis…), ancje se a vegnin al mont tal ospedâl di Tumieç plui di 500 fruts ad an, la maiorance residents fûr dal teritori de aziende sanitarie n.3. Lis diviersis struturis radiologjichis privadis inte Regjon no son saturis, a àn capacitâts ricetivis abondantis. L’ospedâl di Tumieç al eroghe diviersis prestazions radiologjichis dentri i timps massims proviodûts de norme regjonâl e lis richiestis urgjents a vegnin fatis in timps curts. Parcè, alore, une gnove struture a Damâr? Il privât che al investìs isal pardabon cussì sproviodût di no considerâ che il bacin virtuâl di utence nol permetarà di vuadagnâ ce che al baste par mantignîsi? Isal pussibil che al puedi instalâ la ‘famose’ risonance magnetiche che la Regjon e à dineât di comprâi ae Aziende? No soi personalmentri cuintri il privât ma mi somee che il business-plan di chest al sedi pôc sostignibil, a mancul che no sedi une ipotetiche sucessive convenzion cul sisteme Sanitari Regjonâl. Il timp nus fasarà viodi cemût che a laran lis robis, ma purtrop al podarès jessi masse tart pal doman dal nestri ospedâl che al podarès viodi il so servizi di radiologjie depotenziât intal timp, a favôr di une struture privade. Si podarès tratâ dal prin pas viers une sopression e un spostament a val dai servizis che a zontaressin un altri dam a la int che e vîf in mont. ”
✒ Marta Vezzi