«Nol è pussibil lassâ la volontât popolâr tal limbo». Nestre interviste al sindic di Sapade/Plodn

Come che aromai a san ducj, di timp Sapade e spiete di tornâ in Friûl. Fat ben dut chel che e veve di fâ dal pont di viste democratic e burocratic, ce sucedial? Che purtrop cumò dut al è in man al Parlament talian.
––
Sindic Piller Hoffer, vino gnovis par chest benedet passaç di Regjon?
Al moment gnovis a no nd è, magari cussì no. O sin ancjemò achì a spietâ, dal 2008, che il Parlament al fasi bon il passaç di Regjon daûr de volontât dai citadins sapadins che si son esprimûts cul referendum. L’ultin inzornament al è restât a dodis mês za fa, cuant che il Senât al veve tradît ancjemò une volte lis spietis di dute la comunitât. Dopo jessi rivâts adore a fâ passâ la leç pal passaç di regjon tes dôs comissions di Palaç Madame (Belanç e Afârs Costituzionâi), sul plui biel, cuant che si veve di meti in calendari la discussion in aule, la marce indaûr. Di che volte no si à savût plui nuie. La cuistion dal referendum costituzionâl di Dicembar e l’inciertece dal senari politic nol jude, par chest no viôt in curt la pussibilitât che al cambi alc.
––
E la int di Sapade-Plodn cemût vivie cheste situazion?
Mal, propit malon! Plan plan che al passe il timp i sapadins si sconfuartin. Di sigûr cheste Fieste fate a Sapade-Plodn o speri che e rivi adore a movi alc, s’al spietìn ducj. Di sigûr la cuistion no je sierade, no pues vignî sierade in cheste maniere: la politiche no pues lavâsi lis mans, e scuen dâ une rispueste, che e sedi positive o negative, ma nol è pussibil lassâ la volontât popolâr tal limbo.
––
Dut câs il paîs al scuen lâ indevant, cun cuai obietîfs, cun cuale vision pal doman?
La nestre prioritât a si clame turisim, ducj i sfuarç a van te direzion de promozion dal teritori, te valorizazion dal paisaç e des nestri peculiaritâts; la stagjon invernâl che si sta sierant, une des plui anomalis, partide cun tun grum di dificoltâts, e par vie de pocje nêf, e par i problemis dai implants, par fortune si è comedade e o podin dî che o sin in linie cui agns passâts. I moments no son facii: la vite dai comuns ancje sot il Venit a ven ogni dì metude in dificoltât. Soredut par nô, che oltri a patî la specialitât da regjon Friûl, o vin di fâ i conts cui comuns venits di confin, cul Trentin e il Tirôl dal sud: un scuilibri insostignibil che al pese par desenis di milions di euros. Lôr a puedin fâ invistiments, nô o vin di rangjâsi cun chel pôc che o vin.
––
A proposit di ents locâi, in Friûl lis Uti a stan puartant un pâr di rognis, e chi di voaltris la situazion cemût ise?
Chi pal moment si sta puartant indevant un discors di convenzions di servizis tra comuns, no si è volût sfuarçâ la man cun fusion o agregazions; cun tun trop di altris municipis o stin gjestint insiemi l’edilizie scolastiche, lis scovacis, l’assistence, la cjase di polse pai anzians. Al è clâr che in prospetive dal passaç di regjon o stin seguint cun atenzion ce che al sucêt in Cjargne cu la gnove Union. ❚
✒ David Zanirato