NO SON PERAULIS PAR VECJOS. Streaming

Mandi nono!
Mandi frute! Ti disturbio? Stâstu cjalant une robe par television?
No sta preocupâti, nono, ven! O met in polse e o voi indevant une altre volte.
Ah, ise une robe regjistrade? Âstu la cassete?
No, nono! No si doprin plui lis cassetis. No ai nancje il videoregjistradôr! Robe passade.
Usti, e cemût fâstu, alore, a meti in polse la television?
No stoi cjalant la television normâl, nono: al è un canâl in streaming.
Plui che striimi, mi somee un striament! Robe di no crodi. Un film che ti spiete intant che tu fasis altris robis.
No dome un film, nono: tu puedis sielzi ce che tu âs voie e viodilu. Cjale chi: films, telefilms, musiche.
Cence cassetis?
Cence cassetis.
Ma cemût fasial?
E je une trasmission fate midiant di internet. “Stream” al vûl dî flum, corint. Come un flum, la rêt e puarte i dâts e il computer ju lei.
E il film ti rive tal flum?
Te rêt. Tu frachis un boton e al partìs il video, on demand.
Cun la onde a man? Tal flum? E dopo tu lu pescjis cu la rêt? No mi somee une robe masse tecnologjiche.
Ma no, nono, no la “onde a man”: on demand. Al vûl dî che cuant che tu domandis tu lu âs. Pecjât che vuê la rêt no va tant e si ferme la trasmission.
Âstu di clamâ cualchidun a meti a puest la antene sul cuviert?
Ma ti ai a pene dite, nono: nuie antenis, dome rêt!
Ah, juste. Sarà mighe masse cjalt, alore? Pocje ploie?
Ce jentrial il cjalt, cumò?
Se il flum al va in secje, cemût fâstu a movi la onde a man e puartâ il film?
Ma il flum al è dome une metafore, par dî che i dâts a corin un daûr di chel altri. Duncje “stream”, e “streaming”. Ma i dâts a corin tai fii.
Cence ondis a man?
Cence ondis. Dome “on demand”: daûr la domande.
Ma! Tal flum almancul il film al podeve lâ in barcje, ma tai fîi cemût fasial a movisi? Lassimi il gno telecomant, frute, che jo di chest striament no ai voie di savênt nuie.
✒ Bete Di Spere