NO SON PERAULIS PAR VECJOS. Selfie

_Mandi nono!
Mandi frute! Sêstu tornade des vacancis?
_Sì, nono, cumò ti mostri un pocjis di fotos!
Âstu puartât l’album?
_No, nono, no lis ai stampadis.
E ce sêstu vignude, cul proietôr?
_Ma no, lis ai sul telefonut!
No rivi ancjemò a capî cheste robe moderne, che cul telefonut tu fasis di dut mancul che telefonâ. Fasimi viodi, va.
_Cjale, nono: chi al è il piçul te aghe.
Biel il gno nevodut!
_E chi o sin noaltris, ducj e cuatri insiemi.
E cui aial fate la fotografie?
_Noaltris di bessôi, nono: o vin fat un selfie!
Ce robe? E ce fasistu cul selin? Va ben fâ fotografiis cul telefonut, ma cul selin propite no savevi.  Jo lu metevi dome inte mignestre!
_No: un selfie! Al derive di “self”.
Il selin cul seltz? Cumò tu stâs messedant masse robis, frute.
_Self, no seltz! Self al vûl dî “se”, “di bessôl”, e selfie al è cuant che tu ti fotografis di bessôl.
Un autoscat.
_No. Il selfie si fâs tignint in man il telefonut, cence meti il scat automatic. Il telefonut al à ancje une fotocjamare di pueste chi devant, cussì tu ti viodis intant che tu ti fasis la foto.
Ma tu as di vê un braç lunc di chi a là vie!
_Vere, par chel a àn inventât il selfie stick!
Il stiç? Par impiâ la fotocjamare cul fûc?
_Stick, nono: un baston! E insom dal baston, un boton par scatâ la fotografie!
Ma dut chel imprest li par une fotografie?
Cussì tu te puedis fâ cuant che tu âs voie, cence domandâ nuie a nissun.
Cence domandâ nuie, eh?
_Eh, sì, di bessôl.
Di bessôl, sì. Mi plâs cheste invenzion. E à di vêle pensade un furlan.
_Vere, nono: rangjâsi simpri!
E ce ise chê muse di sturnei che o fasês simpri?
_Ah, la duck face! Si clame cussì, cuant che si met la bocje in fûr. Duck face: come il bec di un masurin! E va di mode cussì.
Cjale, no je une mode di cumò, che li. A àn dome cambiât l’uciel e il toc dal cuarp.
_Ce vuelistu dî, nono?
Che ai miei timps no si clamave “a bocje di masurin”, ma a cûl di gjaline!.❚
✒ Bete Di Spere