Mandi nono.
Mandi frute, ce âstu in chê scjate?
O ai comprât une robe bielone pal mâr: un materassin gnûf.
Cemût? No ti vadial plui ben chel blu che ti vevi cjolt di piçule?
Ma nono, a saran passâts plui di 20 agns*! Al sarà ancje sbusât.
E alore? Si podarà comedâ, no?
Ma chel chi nol è un materassin cualsisei. Al è a forme di avocado!
Un materassin a forme di avocat? Cu la toghe?
Ma no! A forme di avocado, la pome! Al è un must-have di chest Istât!
Un mastel?
Un must-have!
No mi somee une robe tant moderne par lâ ta la aghe. Forsit al jere miôr il materassin di 20 agns fa*.
Parcè po?
Almancul tu lu sglonfavis, cussì al stave sù, e cun di plui al jere un pôc fof. Suntun mastel no si sta masse comuts! E se si bute un pôc di une bande, al tire dentri aghe e al va jù.
Ma nono, ancje chel materassin chi si sglonfe!
Un mastel che si sglonfe? No lu vevi mai viodût.
Ma no mastel, nono: must-have. Si lu dîs di robis tant di mode, che tu scuegnis vêlis. “Must” al vûl dî “scugnî” e “have” “vê”: par furlan al sarès un “scugnî-vê”.
Ben, par fuarce si scuen vê un mastel: al covente simpri.
Ma nol jentre nuie il mastel! O fevelavi dal materassin a forme di avocado, che al è un must-have di chest Istât.
Ce robis! Cui aial decidût che si scuen vê un materassin, cun di plui cu la forme di une pome? Di tantis robis che tu scuegnis vê, mi somee propit la ultime. No ti coventino plui altris robis? La cjase? Pan e formadi? Alc di vistîti? Cualchi imprest par lavorâ? Une plere, un falcet, une pinze pal spolert?
Ma nono, si dîs must-have par mût di dî, al vûl dî che al è di mode, che ducj lu àn.
Pardabon? Ducj che a van al mâr cuntun materassin a forme di pome?
No propit ducj, nono. Une vore di lôr, però. L’an passât al jere di voghe il materassin a forme di fenicotar, chest an invezit chel chi.
Fenicotars, pomis… O sês propit stramps, voaltris zovins, sâstu? Ai miei timps, i materassins a vevin la forme di un materàs, dome plui piçul. E, soredut i mastei a vevin la forme di un mastel!
*Bete si sint un pôc plui zovine di ce che e je pardabon. ❚
Bete di Spere
