NO SON PERAULIS PAR VECJOS. Cloud

_Mandi, nono!
Mandi frute! Cemût?
_No masse ben, nono. Mi si è rot il telefonut.
Usti, no rivistu a fâlu comedâ?
_Si, nol è tant chel il probleme. O ai pôre di vê pierdût ducj i dâts che a jerin dentri.
Usti, ma ce podevie stâ dentri di un telefonut cussì piçul? Sigûr pocje robe.
_No tu capissis, nono, o vevi un grum di robe dentri: cjançons, numars di telefon, notis.
Usti, cumò mi visi! Tu vevis ancje lis fotografiis! Tu mi fasevis simpri viodi lis fotos dai miei nevoduts.
_Par fortune chês a varessin di jessi salvis, nono!
Vevistu gjavât il rulin?
_Ma nono, nol esist plui il rulin! Lis fotos a stan dentri de memorie!
No rivi a capî cemût che e funzione cheste memorie. Se il telefonut al è rot, cemût aial fat a dismenteâ dut fûr che lis fotos?
_Parcè che lis fotos a jerin salvadis tal cloud.
Ta un claut? Lis vevistu picjadis tal mûr?
_No, nono, tal cloud!
Propite dentri di un claut?
_Cloud, par inglês, al vûl dî “nûl”. Al è come un disc virtuâl. Invezit di salvâ i dâts sul to computer o sul to telefonut, tu ju salvis su internet, intun server condividût. Cussì ancje se si romp il to disc, tu puedis simpri cjatâ dut, dentri tal “nûl”.
Dentri di un nûl? No mi somee tant comut. Cemût vâstu sù a cirî lis fotos? Cul elicotar?
_“Nûl” al è un mût di dî, nono, ti ai pûr dite! A son salvadis su internet, nol impuarte dulà. Ma il biel al è che tu puedis cjatâlis di dulà che tu as voie: tu lis puedis discjamâ di un computer, di un tablet, di un telefonut.
No rivi a capî: tu lis metis tal nûl e il nûl lis puarte ator? E se il vint ti puarte il nûl di une altre bande?
_Lasse pierdi, nono, masse dificil di spiegâ. Dut câs, lis fotos no si salvin plui tai discs, ma tal cloud, cussì no son problemis ancje se il disc si romp.
Jo no mi fidarès masse, ninine.
_Parcè, nono? E je une tecnologjie ben fate!
O podarai ancje crodi che il claut no si rompi, ma se il nûl al bute ploie, sta sigure che il claut al ven ruzin! ❚