✽✽ A moments nus ven di domandâ perdon al letôr pal fat di ricuardâ, pe enesime volte, considerazions passadis che a vegnin confermadis de realtât in maniere puntuâl.
✽✽ Cuant che par esempli o scrivevin che il destin di cheste regjon, e in particolâr dal Friûl, nol podeve dipendi dome des fortunis dal puart di Triest, no dome o marcavin alc di logjic, ma o metevin in vuaite cuintri di un pont di viste centralist dal disvilup, che nol abadave al rest dal teritori, o salacor che lu condanave a deventâ une sorte di aree sotsvilupade a servizi di une fuarce egjemoniche. Ce che al è daûr a capitâ tal Orient di mieç, cul bloc o i gnûfs pericui di chês rotis che a àn destinazion tal Adriatic, al dimostre cemût che situazions instabilis a rivin a mudâ sigurecis gjeopolitichis e duncje economichis.
✽✽ In chest cuadri al pâr pardabon imprudent lâ a sestâ l’aspiet aministratîf regjonâl, dut câs o sin sigûrs dome di une robe: cualsisedi gnove propueste organizative che e rivarà, nissune e varà efiets sul rûl dal cjâf lûc julian. Di fat, che si feveli di tornâ a meti sù lis provinciis, ma ancje di une ipotetiche separazion fra il cussì clamât “Friûl storic” e Triest, nol cambiarà nuie pal vêr podê esercitât di chê citât e de sô classe politiche. Se e deventarà citât metropolitane, pussibilitât za previodude a nivel legjislatîf e duncje di podê meti in vore daurman, o se e deventarà une gnove provincie cui cinc Comuns tacâts di jê, e restarà simpri “capitâl” de Regjon, cui beneficis e cui privileçs peâts a cheste cundizion, e e rivarà ancjemò a paronâ sul so avignî.
✽✽ Jessi cussients di chest al puarte cun se consecuencis.
La prime e tocje cui che al cjale ancjemò al autonomisim furlan, che nol è bon di ufrî une propueste concrete e alternative che no vedi lis sôs fondis dome te denunzie de debilece, reâl, dal ent comunâl. Cuant che si fevele di istituzions di Aree vaste, si scuegnin definî lis lôr suazis e i contignûts, se no si fâs dome filosofie.
✽✽ La seconde e tocje cui che al è sigûr, cemût che o sin nô, che il popul furlan al larà indenant a jessi une entitât etniche, storiche, linguistiche, uniche e definide a clâr di là di sierais aministratîfs e interpretazions fantasiosis e malsanis.
Tornâ a dîlu nol pues che judâ e stiçâ ogni dibatit di chi indenant. ❚