TIn chescj mês di inciertecis e di solitudin, a son stadis tantis lis iniziativis di artiscj e musiciscj che a àn volût – midiant de musiche – puartâ sperance tes cjasis dai furlans e dâ une man a cui che al à plui dibisugne.
◆ Il cuore resta aperto – Andrà tutto bene e A fâ ben nol è mai mâl – Fragile a son dome doi dai tancj progjets nassûts ta chest periodi gravôs, ideâts cuntun dopli obietîf benefic. Il prin al è chel di tirâ dongje alc di concret di donâ, rispetivementri ae terapie intensive dal Ospedâl di Udin e al UILDM di Udin, e il secont al è chel di rivâ a difondi un pocje di positivitât.
◆ Al jere di fat metât Març, in plene emergjence Covid-19, cuant che Giulia Daici e à scrit il gnûf toc Andrà tutto bene. Il progjet Il cuore resta aperto al coinvolç tredis artiscj, ven a stâi Giulia e i cjantautôrs Angelica Lubian, Irene Dolzani, Simone Rizzi, Louis Armato, Lucas, Franco Giordani, Proph, Andrea Travan e i musiciscj Enrico Maria Milanesi, Lorenzo Tempesti, Andrea Buiat, Daniel Longo e cul video de regjiste Aurora Ovan, cu la sô cjase di video produzion DARE. Il risultât al pues jessi viodût su lis plateformis sociâls, su youtu.be/qnadZfJmWvI e sui negoziis digjitâi principâi.
◆ A fâ ben nol è mai mâl, e je invezit la campagne di racuelte fonts par judâ la Unione italiana lotta alla distrofia muscolare di Udin a comprâ une machine pal traspuart di personis in carocine, di donâ a une famee cun dificoltâts economichis. Cu la cjançon Fragile i artiscj a volevin meti dongje 12.000 euros e a son rivâts al obietîf. Il grup di amîs si compon di: Michele Zanuttini, Alberto Netti, Mirco Varotto, DJ Tubet, Alberto Chiavone, NIcolas Morassutto, Ivo Boscariol, Massimo Zanuttini, Matteo Floreani, Cristian Tavano, Andrea Guarascio, Francesco Marzona e Maurizio De Ascanis e Dario Snidaro pe promozion. La campagne e je stade publicade su Facebook, GoFundMe www.gofundme.com/f/uildm e su youtu.be/JjwF7ukhTG0
◆ «Tantis personis nus àn ringraciât che o sin rivâts a puartâur un pocje di serenitât intun moment tant dificil. E cheste e je une robe bielonone!»
Cjapìn l’esempli di chescj artiscj e fasìn dal ben ogni dì. ❚
