MUSICHE. Stefano Montello al fâs l’ort intun cd

«Jo o soi dome un che al fâs l’ort. O semeni, o cjali, o curi e o racuei. No ai mai fat altri inte vite. Ma cuant che o fâs chestis cuatri azions, jo no fâs, jo o costruìs. E o soi il paron di me stes. O soi fintremai un poete, essenziâl come un poete». Stefano Montello, contadin e musicist, un poete al è pardabon. «Montello ha scelto il friulano per accompagnarci dentro la sua metafora e mai lingua poteva essere più pertinente», al à scrit Pierluigi Cappello, inte prefazion al libri “Manuâl critic pal ort. L’art da la jeche” vignût fûr tal 2008 pe cjase editore Forum, che dentri de Primevere si cjatarà ancje voltât par talian. Di chest libri cun protagonist l’ort, metafore de vite e de cognossince, crosere jenfri i cuatri elements e i cinc sens, al confin jenfri nature e culture, tal 2010 al è nassût ancje il spetacul teatrâl “L’ort”, pe regjie di Elvio Scruzzi, cu lis musichis

origjinâls di Cristina Mauro e la presince tal palc di Sebastiano Zorza ed Ermes Ghirardini. Spetacul riproponût ai 8 di Fevrâr di chest an a Sedean: in cheste ocasion il fondadôr dai Mitili Flk al à presentât il gnûf cd omonim (siei i tescj), insiemit cun Cristina, storiche vôs dai Flk, Ermes aes percussions e Sebastiano ae fisarmoniche. Sedis tocs, par metât leturis poetichis cu la vôs di Montello, colone sonore dal spetacul teatrâl e buine par scoltâle ancje jù dal palc. In plui, cul plasê di viodi riunît un toc dai Flk, intant che o spietìn un gnûf lavôr dal grup, e o sperìn di no spietâ inmò masse. «O vevi gust di completâ il percors creatîf tacât cul libri, lât indenant cul spetacul teatrâl e cumò coronât cul disc» al dîs Montello «o crôt che il completament creatîf al sedi impuartant e che tropis voltis no si fâs cu lis robis par furlan, che a vegnin lassadis lâ al lôr destin. La musiche e la peraule in teatri a completin la espression artistiche dal ort». Anzi, Ort cu la O maiuscule. «L’Ort ti met in relazion cu la vite vere, al è un patrimoni di esperiencis che ti permet di vivi miôr, al è terapeutic, ancje se no tu sês malât, ti jude a relazionâti, nol è fin a se stes, al è dinamic, ti met in contat cu lis stagjons: al è un teatri. E al è sacri. Nol è puest miôr dulà viodi sot i tiei voi la fusion jenfri la vite e la muart. Par chest o dîs che l’Ort al à la O maiuscule». L’Ort come fat culturâl, duncje, ma ancje economic: «Prin o dopo si rivarà a convincisi che l’Ort vuê al è une pussibilitât lavorative concrete. In Friûl o produsìn il 25% di ce che o mangjìn, al è marcjât. I comuns a àn di sburtâ la int ae pussibilitât de tiere, lâ incuintri aes esigjencis dai zovins cun cooperativis. L’Ort e je une font di sorevivince. In cheste civiltât industriâl che e sta finint, al covente tornâ in campagne». Stefano Montello dut chest lu met in pratiche di 30 agns e cumò lu fâs ancje cu la Fatorie Sociâl Volpares intal comun di Palaçûl. Culì, cui prodots dal ort al è daûr a meti adun un progjet di lezions di cusine, insiemit cul chef Germano Pontoni, president de Unione Cuochi del Friuli – Venezia Giulia. «Cuntun cicli di lezions e une fieste la ultime domenie dal mês, di Avrîl a Setembar, o volìn fâ viodi la trasformazion des verduris in ce che o mangjìn, dal cjamp al sformât di verzis ben lavorât cul Montâs. Lis personis che a lavorin achì a puedin sintî il leam jenfri campagne e cusine, ma lis lezions a saran viertis a ducj». Par trasformâ e par cognossi i prodots dai cjamps, par fâ esercizi di vite. «Par fâ l’Ort» al dîs Stefano «bisugne praticâ la libertât, la curiositât, la costance, la dedizion, la fuarce, la ligrie, jessi inocents».❚
Natascia Gargano