MUSICHE. Gnovis in Onde

«Nus mancjave un program dedicât dome ae musiche furlane». Cui lu aial dit? Une radio taliane cu lis frecuencis te Patrie? Sbaliât. Cheste e je peraule di Mauro Missana, diretôr di Onde Furlane.
HITS FURLANIS_ Cussì di Fevrâr te “radio libare dai furlans” o podarìn scoltâ di buinore (e biadelore!) “Friûl Parade”, il gnûf program di Mojra Bearzot dedicât a pont ae sene musicâl furlane dal lunis al vinars des 8,30 aes 9. «Al somearà strani, ma nus è simpri plasût meti dongje la musiche fate in Friûl cun chê di dut il rest dal mont», al zonte Missana. Strani o no, di sigûr cheste carateristiche e je stade par agns la carateristiche de radio, vierte al teritori ma no sierade intai nestris confins.
ATENZION INTERNAZIONÂL_ Tes gnovis dal palinsest no mancjin di fat i programs di respîr plui internazionâl come “Babêl Europe”, cuindisinâl in onde za di Zenâr il martars aes 11 di matine e in repliche il miercus a une dopodimisdì e curât di Marco Stolfo, alternât cun “Internazionalitari” di Carli Pup (che o vin o fevelât tal numar passât dal gjornâl). Chi o podìn stâ inzornâts su la musiche contemporanie di Sardegne, Ocitanie, Paîs Basc, Bretagne, Galizie, Scozie, Paîs Catalans e chês altris lenghis minorizadis de Europe. Un altri apontament dedicât ae musiche, al è “Corais musicâi” di Lia Bront, rubriche de musiche pal cine.
ROF NO MOLE_ Nus plasin no tant o no dome lis novitâts, ma soredut la voie di une cooperative metude a dure prove dai tais de Regjon di no stâ cu lis mans in man, ma di meti in moto la scuadre e fâ simpri lavorâ il so laboratori: «O crôt che Onde Furlane e vedi Gambiât, an dopo an, il so rapuart cui scoltadôrs, ancje cun chê di cjapâ dentri lis gnovis gjenerazions», al dis Missana. «Vuê o vin un public cetant diferent di chel di 30 agns indaûr. Vuê o sin une radio vierte al teritori, che si sposte, come cul Liet International, Viva Onde Furlane, lis diretis di Friuli Doc e Vinitaly, e dut il lavôr fat ator, ma ancje une radio dulà che ducj a àn spazi, dal pont di viste culturâl e musicâl. E va dilunc a jessi une farie di iniziativis e cu la gnove programazion chest an o vin decidût di olsâ ancjemò di plui». Buine scolte su www.ondefurlane.eu. ■
Natascia Gargano