Mostre di Sandri Di Suald a Pordenon

Pordenon simpri plui furlan. Fin ai 19 di Avrîl, il Teatri comunâl «Giuseppe Verdi» al da acet ai lavôrs di un artist – Sandri Di Suald – che cui siei lavôrs al à judât, miôr ancjemò educât, i furlans a cognossi lis lôr lidrîs, a vê plui cussience de lôr storie e culture, de lôr lenghe, de lôr identitât.
Tal foyer dal Teatri, ogni dì des 4 e mieze daspomisdì aes 7 sot sere e intai oraris dai spetacui (jentrade a gratis cun pussibilitât di visitis vuidadis; informazions al numar 0434/247624), si podaran amirâ une sessantine di disens e une cincuantine di libris che a ilustrin la ativitât editoriâl di Di Suald. Un vêr sperimentadôr cun passe cuarante agns di ricercje di schene, contâts cumò te mostre «Di Suald. Contis e pipins di soreli jevât». Ilustrazions tradizionâls, virtuâls, fumets, ma ancje materiâi no publicâts, tant che chei relatîfs al gnûf libri su Benandants e Malandants, li che i vuerîrs dal mît furlan a zuin cu la art moderne e cun chê contemporanie.
Di Suald al lavore tal cjamp de comunicazion e de culture di agnorums. Ancje scritôr, al à vinçût intal 1985 il premi leterari «San Simon» cul romanç Ah! La provincie. Al è l’inventôr di Tarvos, il prin fumut stampât dut par furlan. Tra i siei personaçs a fumuts a son ancje Tzan le Valdotaine, trilengâl e fat pai valdostans, e la suriute Relè. Tra i siei libris o ricuardìn Arrivano i longobardi! e Salvans!. Al à inmaneât cetantis mostris, tant che chê, di grant sucès, su Kandinsky a Vile Manin.❚
✒ Erika Adami