Messe di Aquilee

Ancje chest an nol mancjarà di jemplâ la Glesie Mari di Aquilee il cjant dai Sants Ermacure e Fortunât, patrons dal Friûl, pe messe che Glesie Furlane (www.facebook.com/glesiefurlane), la associazion di predis e laics, e celebre ogni an par furlan. L’apontament al è pai 19 di Lui aes 6 sore sere. Tignît di voli ancje il nestri sît (www.lapatriedalfriul.org) e la nestre pagjine Facebook li che o comunicarìn i particolârs (i vescui invezit le varan celebrade ai 12 di Lui a buinore).
Partecipâ ogni an a Aquilee nol è dome un impuartant apontament liturgjic, ma al è vignî a zontâ un “got di vueli” ae lum de nestre identitât.
Se plui voltis si à fevelât di un imni nazionâl furlan che inmò al mancje, no puedin lassâ indiferentis lis peraulis dal Cjant dai Sants Ermacure e Fortunât, che intun passaç al dîs “Chi l’om furlan e chel da la Slovenie, e il todesc a cirin amicizie e, tant diviers, a cjatin une patrie, che e à tai martars dute la sô fuarce…”. Un messaç di pâs e fradilance che tal Continent Vieri al viôt il Friûl tant che il cûr di chê Europe dai popui che o bramìn, ma che magari cussì no e reste inmò un sium di realizâ ad implen. Vie pe messe e di fat a son previodudis ancje lis leturis par sloven e todesc.
Christian Romanini
✽ ✽ ✽
IL CJANT DAI SANTS
ERMACURE E FORTUNÂT
Sù, faiti dongje, int di Sant Ermacure,
al to pastor e a Fortunât rivolziti,
ai testemonis, che tu sâs in glorie,
parcè che pe lôr fede a àn dât la vite.
Achì passarin, come vint in furie,
popui ruviei di brame e di tristerie,
ma tu âs viodût te dì de gran’ miserie,
il segno che il Signôr no ti bandone.
Gjolt, Aquilee, Diu ti da la glorie,
che, fruçonâts i mûrs de tô supierbie,
cence des armis cjantis tu vitorie
pai tiei nemîs clamâts a jessi fradis!
Chi l’om furlan e chel da la Slovenie
e il todesc a cirin amicizie
e, tant diviers, a cjatin une patrie,
che e à tai martars dute la sô fuarce.
Chi la semence de Furlane Glesie,
di Redenzion e puartave lis primiziis
e tal martiri si viestì di glorie,
sfidant a muart la prepotence umane.
Laudât Idiu, Trinitât santissime,
Pari, cul Fi, a pâr cul unic Spiritu,
che al sielç i debui, cun dissen di gracie,
par palesâ tal mont la sô potence. Amen.