Al sarà presint ancje il president de Republiche taliane Sergio Mattarella aes celebrazions pal inovâl dai 80 agns de proclamazion de Zone Libare de Cjargne che si davuelzaran dai 8 ai 22 di Setembar. La cerimonie principâl di comemorazion cu la presince dal cjâf dal Stât si davuelzarà sabide ai 14 a Dimpeç, capitâl di cheste Republiche autonome che i partigjans a vevin metût in pîts vie pal Istât dal 1944 liberant 38 comuns e passe 80 mîl personis de ocupazion dai nazifassiscj. E fo une prove di resistence civîl che no à pareli par inovazion democratiche, stant che su chescj teritoris, par esempli, lis feminis a poderin votâ pe prime volte in Italie. La Zone Libare de Cjargne e je stade un tentatîf corâl di protezion de comunitât intune fase dramatiche de Seconde Vuere mondiâl e par chest e ven studiade a nivel talian e internazionâl pal caratar origjinâl de autodeterminazion dai ribei e lis teribilis consecuencis che e à puartât, a partî de violente repression des trupis cosachis sul teritori.
◆ Par chest la ANPI, la Comunitât de Cjargne e il Comun, la Regjon, la Universitât dal Friûl, l’Istitût Furlan pal Moviment di Liberazion, la Apo e Legambiente si son metûts dongje par inmaneâ un program che al met dongje storie, memorie, e visitis sù pai trois e pes monts dulà che – come chel diseve Piero Calamandrei – la lote dai partigjans e à fat nassi la Costituzion, intune suaze di libertât e di democrazie. ❚
Mattarella in Cjargne pai 80 agns de Zone Libare
Dree Venier
