Il grup di Glesie Furlane si è tornât a cjatâ te sô sede simboliche di Vençon.
Lu à fat Domenie ai 27 di Mai, te dì des Pentecostis. Al jere il prin incuintri dopo de muart di pre Antoni Beline e e je stade la ocasion par rifleti su lis prospetivis e l’avignî de Associazion culturâl che e met adun predis e laics. Vie pe riunion dal dopomisdì al è stât marcât il rûl di pre Antoni Beline, tant che pont di riferiment de culture e societât dal Friûl. Il diretîf al à confermât tant che Dean Zuan Pieri Biasat e segretari pre Tonin Cjapielâr. Invezit, il gnûf vicepresident di Glesie Furlane al è bonsignôr Roberto Bertossi di Vençon.
La linie de associazion e je chê de continuitât sedi tai apontaments mensîi a Vençon sedi tal impegn pe realizazion di cunvignis. Finide la riunion, aes 7 sore sere e je tacade la messe grande in chel domo, li che pre Antoni Beline o, come che lu cognossevin a Vençon, “pre Pieri Massangat” al è stât batiât e al à scuviert la sô vocazion di predi.
Une atmosfere indescrivibil e à invuluçât lis tantis personis che a àn jemplât la glesie, li che intune grande solenitât e partecipazion emotive al à celebrât la messe bonsignôr Roberto Bertossi. Cun lui a àn concelebrât 14 predis; il cjant al è stât compagnât de corâl di Guart “Rosas di Mont” direte dal mestri pre ‘Zef Cjargnel.
Finide la celebrazion, a son stadis puartadis dôs testemoneancis di bande de int: Cristian Liberale, un zovin di Visepente, al à ricuardât i agns passâts dongje di pre Antoni, e il prof. Remo Cacitti, docent di storie des origjins dal Cristianesim ae Universitât Statâl di Milan, al à disvilupât lis liniis de valence umane, culturâl, religjose e la grande dimension profetiche di pre Antoni. Da pît de celebrazion a son stâts ancje ricuardâts i prossims apontaments. Il moment plui alt al sarà domenie ai 15 di Lui cuant che Glesie Furlane e celebrarà la messe dai Sants Ermacure e Fortunât te basiliche mari di Aquilee. Come che al declare il segretari di Glesie Furlane “I sorestants de Diocesi a vevin imprometût par cheste fieste la presentazion dal Messâl Roman par Furlan, ma i Vescui a rivaran a Aquilee scjassant lis mans. Di fat il messâl al è blocât te segretarie de Conference Episcopâl Taliane (Cei) a Rome. Un at dispotic, une grande injustizie viers la nestre glesie e popul. Glesie Furlane, continuant te memorie e tal spirt di pre Antoni, tradutôr de Bibie e dal Messâl, si impegne a cjaminâ su la strade che lui al à segnade par une gnove glesie plui evangjeliche e pal ben dai furlans”.
I Protetôrs de nestre Regjon
I Sants Ermacure e Fortunât a son venerât come Sants de Glesie Catoliche. A son i Sants protetôrs dal Friûl – Vignesie Julie (cun at uficiâl dal 2001) e ancje protetôrs des Citâts di Udin, di Grau, de Diocesi di Gurize, coprotetôrs de Arcidiocesi di Lubiane (Ljubljana, Slovenie) e di tantis altris localitâts plui piçulis de Regjon. A son ricuardâts insiemit ai 12 di Lui. I Sants a viverin a Aquilee tor dal secul III. No si àn notiziis tant precisis su la lôr vite. Il lôr cult al è une vore antîc (a son citâts ancje tal Martirologji geronimian, test dal secul V), massime a Aquilee, e al è stât consolidât dal Patriarcje Popon che tal 1031 al dediche ai doi Sants la Basiliche Patriarcjâl di Aquilee dopo de dedicazion mariane. Sant Ermacure al è venerât tant che protovescul e protomartar di Aquilee, di fat cun lui al tache il catalic episcopâl de citât. Une tradizion plui tarde (VIII – IX) e conte che si tratave di un no cristian che al incuintrà Sant Marc, mandât di Sant Pieri a evangjelizâ lis zonis dal alt Adriatic.
Sant Fortunât al fo diacun di Ermacure e i doi a patirin insiemit il martiri sot dal ream dal Imperadôr Neron.
