(L)INT FURLANE. Tant che pes inte aghe

✽✽ Intes aulis dal parlament talian si celebre la fin de integritât istituzionâl dal Friûl cul enesim regâl a Triest de bande dal Pd, cu la capitâl regjonâl che e à cussì la pussibilitât di deventâ, in graciis de citât metropolitane e dal rest des ex provinciis furlanis, distrutis pes ambizions personâls de Serracchiani, unic centri di disvilup e decision.
✽✽ Une rispueste a cheste strategjie di anulament de identitât furlane e je vignude di un nudrît grup di sindics che, intai ultins doi agns, al à cjapât posizion plui voltis, cun iniziativis par rimarcâ il fat che dome midiant di une leture identitarie si pues vuê fevelâ di disvilup e di futûr dal Friûl.
✽✽ Chest moviment, caraterizât di contignûts esprimûts de “Cjarte di Merêt”, al à permetût che la planificazion “bulgare” de atuâl zonte no passàs sot dal cidin plui assolût, ma che, anzit, ancje tra i prins citadins dal centri çampe, a nassessin dubis e bruts umôrs pes riformis caladis dal alt e cence rispuestis obietivis.
✽✽ Intant, altris contradizions a viodevin la lûs, in graciis de iniziative referendarie dal sindic Anzil e dal dinei de bande de assemblee regjonâl di ametint l’acet e il davuelziment sucessîf.
✽✽ La democrazie e je une marcjanzie simpri plui rare sul marcjât dai partîts talians. O crôt che nô furlans invezit propit di cheste o vin di ripartî, no dome par motivazions etichis, ma par dibisugnis politichis.
✽✽ Se di fat o consegnassin a une rese dai conts tra partîts, al scuintri diestre – çampe il nestri destin e ancje chel istituzionâl dal teritori, o cambiaressin dome che l’aministradôr di condomini, intant che si sdrumin lis fondis.
✽✽ Chest par dî che se no sarìn bogns di organizazion capilâr intai paîs, intes frazions, dapardut e no dome in cualchi zone che, propri in graciis de azion di chei sindics zovins si sta dimostrant plui sensibil ae partecipazion e al impegn diret, no sarìn in grât ni di ufrî une alternative buine al progjet statalist ni tant mancul di batilu.
✽✽ Mi vegnin iniment lis presentazions dal nestri gjornâl che o fasìn ator pal Friûl: a puedin jessi plenis di int, o ancje no, ma di ognidune di chestis al nas dibatiment, convinzion. Une pidade insume ae rassegnazion e al pessimisim.
E baste une stanzie di ostarie, un locâl de pro loco, ma il cjatâsi insiemi di cui che al crôt ae libertât dal Friûl al è il fatôr necessari e determinant de bataie che o sin daûr a combati. ❚
✒ Dree Valcic