(L)INT FURLANE. Sapade tradide dal dopli zûc Pd

✽✽ Par un moment i vin crodût, sperât che la riunion de Comission dal Senât e segnàs l’ultin passaç de tornade di Sapade al Friûl. Epûr, intai ultins dîs alc al veve di fânus rifleti che l’aiar al jere daûr a cambiâ, de riunion dal consei provinciâl di Belum aes declarazions di Zaia a chês dal sotsegretari Bressa. Un de Leghe, chel altri dal Pd, ducj i doi venits.
✽✽ L’acuardi par tradî il referendum di Sapade si consumave intai palaçs dal podê. Ma al someave impussibil che si podès rivâ a tant, a un imbarbariment de politiche cussì insurît, a une cjapade in zîr de democrazie. Stupits nô e ducj chei che a àn sostignût simpri la bataie di Sapade a no visâsi che cuant che si trate dal Friûl, dai siei dirits e di dut ce che al à a ce fâ cun la sô autonomie, si pues simpri freâsi des leçs e de volontât popolâr.
✽✽ La responsabilitât di ce che al è sucedût, de violence istituzionâl che a son restâts vitime i sapadins, e à un non e un cognon: si clame Pd.
✽✽ Nol pues jessi, di fat, che la presidente Serracchiani, vicesegretarie nazionâl di chel partît, il numar doi dopo il prin ministri Renzi, no sedi stade in stât di impedî, di meti il veto a une sielte dal SO guvier che, di là di no rispietâ i principis democratics, si pandeve ancje tant che un atac ae specialitât regjonâl.
✽✽ A sunin dibant e fals i proclamis sucessîfs ae decision di imberdeâ il câs Sapade: lagrimis di un crocodîl cun ancjemò tal gargat il cjavret sbranât.
✽✽ Magari cussì no, ancjemò une volte si sin fidâts des peraulis, intant che di bogns furlans o vevin di tignî ben presint che a contin dome che i fats. Dut il rest al è dome che un zûc di spiei, fûcs di artifici mediatics, par inmascarâ lis propriis responsabilitâts. ❚
✒ Dree Valcic