(L)INT FURLANE. I partîts talians e i lôr soldaduts a son dome un pês

✽✽ Che si fasi a Sapade/Plodn l’inovâl pal 3 di Avrîl, la date che nus ricuarde la nassite de Patrie dal Friûl, al va no dome sotlineât cun fuarce, ma puartât par esempli di une voie di democrazie tornade dongje. A cheste si à di acompagnâ la convinzion che cheste voie vuê e je leade a strent a la vitorie dal autonomisim.
✽✽ Un tiermin che a sô volte, nol va viodût dome tant che espression juridiche o istituzionâl, tant che premesse pal autoguvier, ma ancje e soredut di concezion dal mont, vision de politiche e duncje, dai rapuarts umans e sociâi che a determinin lis regulis de societât civîl. Normis che si basin sul rispiet mutuâl e des minorancis, sul coret rapuart tra dirits e dovês, sul control dai elets inte trasparence de robe publiche.
✽✽ Il pinsîr autonomist al è la concezion filosofiche che e permet di lâ fûr des secjis di chês ideologjiis che, une volte racuelte in pratiche, a àn puartât ae crisi de societât contemporanie, ae mancjance di prospetivis intun mont slambrât di conflits e contradizions.
✽✽ Chel che al sucêt in Friûl, nol è che il riflès di chê agonie che e viôt i partîts talians no in stât di frontâ i problemis reâi, a volê jessi bogns, o fintremai compliçs de crisi di cumò.
✽✽ Dute la classe politiche taliane e i siei soldaduts regjonâi fedêi, e rapresente chel pês al pît che il popul furlan al à di diliberâsi di corse prime che e lu cjapi sot inte sô ruvine fiscant ce che al reste dai sacrificis fats de nestre int par vignî fûr de miserie e dal sotsvilup.
✽✽ Ae fin dai agns ’60 il Friûl si cjatave cuasi al pâr des zonis deprimudis dal meridion, dopo dal taramot o jerin rivâts a lis posizions di cjâf, vuê o sin vie par tornâ indaûr ai agns ’60.
✽✽ Se no bastassin i rilevadôrs economics, a rivin altris segnâi de cuotidianitât. Doi esemplis par ducj. In Cjargne si torne a manifestâ cuintri lis servitûts militârs e il guvier si “dismentee” di meti il furlan inte convenzion cu la Rai: i doi temis a jerin dentri inte letare famose dal clericât furlan, li che 529 predis a denunziavin il stât di sotsvilup là che si cjatave il Friûl e lis responsabilitâts dal podê politic. Al jere il 1967, in maniere esate cincuante agns indaûr!
✽✽ Se duncje i partîts talians e lis lôr sucursâls locâls, a àn falît, parcè nudrî sperance in cualchi ferment gnûf, parcè crodi intun salt di rabie e braùre popolâr a poie dal autoguvier? Cose e pues sburtâ a vê fiducie intune classe politiche gnove e furlane, sburtade dai stes ideâi che a son stâts di Placereani, Sclâfs, Marcs, Marcuts, Bielute?
✽✽ I precedents no son ciert legris: dispès si è vût miôr fâ di croçule al podê e ai siei partîts, altris voltis e je prevalude la division, intant che i personalisims a trionfavin.
✽✽ Ma vuê o sin obleâts, no vin sielte: o si cjape la strade dal partît autonomist furlan e si va a vinci
o si è  fûr di ogni pussibil futûr.
✽✽ Par nô, vecjos autonomiscj, al sarès dome che il fin di un sium, ma pai nestris zovins un jevâ tragjic. ❚
✒ Dree Valcic