(L)INT FURLANE. Al Pd no i plâs il furlan

Pardut il Friûl, ancje par vie de pôre dai atentâts, a son passâts in chescj mês estîfs miârs e miârs di turiscj, in maiorance forescj che – dispès pe prime volte – si son cjatâts a contat cu la nestre realtât.
**Une realtât – inte maiorance dai câs – tibiade, par ce che al rivuarde la cognossince, de universalitât di Vignesie, di un gjeneric Nordest, misteriôs par tancj talians.
**In cheste vetrine espositive de nestre ufierte turistiche e slûs, al è propit il câs di dîlu, tant che uniche perle, la iniziative che la nestre riviste – in graciis dal cjalâ lontan de Provincie di Udin – e à metût in at par fâ capî ai nestris vacancîrs che pardabon a jerin “ospits di int uniche”, cemût che al diseve un vecjo messaç promozionâl de Regjon.
**Unics tant che chê lenghe furlane che a podevin cjatâ scrite e stampade su chês pagjinis, suntun gjornâl vêr, intes struturis ricetivis no dome alberghieris, là che si cjatavin a stâ.
**Un segnâl fuart par fâ savê che a jerin devant di un popul cuntune storie milenarie, une culture ancjetant curiose e particolâr: une imagjin insume divierse di chê omogjeneizade e superficiâl che par solit a cjatin fûr intes campagnis publicitariis, intai depliants regjonâi e in masse vuidis.
**Un progjet smirât, no une difusion a ploie di un volantin che si pues dismenteâ, ma un “souvenir” particolâr di meti te valîs, di puartâ a cjase e di mostrâ ai amîs: cheste e je promozion par un bacin di utence che simpri plui al cîr feriis diviersis, particolârs, sioris di un pont di viste culturâl e sociâl.
**Dulà che e conte la esclusivitât, che e sedi antropologjiche, naturâl o enogastronomiche. E i coscj a rapresentin un aspiet di ogni iniziative.
**La domande che o fasìn duncje al Pd, incagnît opositôr de delibare provinciâl di contribût, se no fos stade la “Patrie”, cence l’intervent de Provincie a colaborâ cui gjestôrs di albierc, cuale iniziative, cuâl program si varessial presentât intal setôr turistic bon di valorizâ, di sostignî la lenghe furlane tant che valôr zontât de ufierte turistiche?
**Se di no, al è dibant fâ cunvignis su lis lenghis minoritariis, cjantâ i lauts di ARLeF e Filologjiche, cuant che dopo si alcin mûrs cuant che il furlan al devente realtât vive e propositive.
di Dree Valcic