Marco Stolfo, La mê lenghe e sune il rock (e no dome chel), Udin, 2011

“O vin fat trente, o fasarìn trenteun…Al cjantave cussì Giorgio Ferigo cul Povolâr Ensemble te cjançon 30 agns. Par un an, su par jù dal mês di Zenâr dal 2010, chel viers al è deventât il sproc di dutis lis iniziativis pes celebrazions dai trente agns di aivitât di Radio Onde Furlane. Nol è un câs che chel inovâl al sedi stât memoreât doprant un toc di une cjançon di autôr furlane contemporanie.”
◆ Un sior libri. Dusinte e cincuante paginis dividudis miezis par furlan e miezis par talian, plui altris vot di fonts documentâls e bibliografichis e altris vot di fotografiis di musiciscj furlans e di altris lenghis minorizadis. E un cd alegât. Sîs cjapitui (plui la jentrade e lis conclusions), ogniun dividût in sezions e ogni sezion e à in ‘esergo’ une citazion di un storic o di un musicist o di un poete in teme sul argoment. Si va di un incuadrament storic dal Friûl geografic, de sô lenghe e de sô musiche, a la narazion de nassite de gnove musiche furlane, fin alis tindincis plui modernis e avanzadis. La tesi di font e je che nissune civiltât no reste vive se no acete di rinovâsi, se no le finis di cjalâ simpri in daûr. Il ‘mandi Friûl’, il ‘vecjo Friûl’ a son dome sprocs di une nostalgje sterpe che e finis par condanâsi a une lente muart. Grant duncje il mert di grops tantche il Canzonîr di Daêl e il Povolâr ensamble e po di iniziativis sicu la riviste Usmis, il premi Friûl, la etichete Musiche Furlane Fuarte, promovude di Radio Onde Furlane, Festintenda, Folkest. La tradizion des vilotis e à di sposâsi cun stradis gnovis sicu il rock, l’etnopop, il blues, il punk, l’ hip-hop e v.i. Al è ce che a àn fat e che a fasin i Militi FLK, Inzirli, I crots sclizzâs, Furclap, Arbe garbe, Bande zingare e v.i. E cjantants-autôrs sicu Lino Straulino, Gigi Maieron, Loris Vescul, Red Kaa, Aldo Giavitto.
◆ Il voli dal autôr al si slargje a scrutinâ altris realtâts di lenghis minorizadis che a àn savût produsi musichis in sintonie cul mont che al gambìe (date impuartantone il 1989, cuant che al cole il mûr di Berlin): la Ocitanie, la Sardegne, il paîs basc, la Catalogne, la Bretagne, la Ladinie e i Grisons, la Corsiche. Une miniere di informazions e analisis, une sorte di libri di test par un cors di nivel univesitari di storie de musiche furlane. ❚