L’EDITORIÂL – Jù lis mans dai nestris emigrants

I nestris paîs a son plens di sagris e la int e torne a cjatâsi dopo un an. Un altri Istât duncje par chei che a rivin di fûr, che a tornin par passâ lis feriis in Friûl: che a tornin a cjase. Chest a è il mês dai emigrants, magari di chei che a puedin, viodût cemût che a son lis robis e lis crisis ator pal mont e ancje lis feriis a patissin de mancjance di bêçs.
O dovaressin pensâi di plui parsore sui nestris fradis sparniçâts pes Americhis, in Europe, fintremai in Cine. Di sigûr par capî la gnove cualitât de emigrazion, ma no dome par chest.
O varessin di tignî simpri indiment che a son plui i furlans tal forest che chi di nô. E cui numars no si scherce, a pesin. Provait a pensâ trop che a àn contât, dome par fâ un esempli, te vicende irlandese: se nol fos stât pal jutori des comunitâts americanis, al sarès stât dificil puartâ indenant il procès di indipendence. No dome lôr, si capìs, ma daûr di ogni popul che al lote pe sô autonomie a son i lôr fradis fûr dal paîs. Par cualchidun, e mi somee che no vedin ducj i tuarts, a son lôr che a tegnin plui alte la flame des tradizion, de lenghe, dal sintîsi furlans.
Almancul fin cumò.
Si scuen dîlu che tai ultins agns si fâs di dut par ribaltâ, par calâ chest sintiment, par fâlu finî tal mignestron de talianitât.
A son segnâi che a rivin dai nestris Fogolârs dulà che, par esempli, si sburte plui sul insegnament dal talian che no de marilenghe, sul metisi dongje a altris clapis par – a contin – “jessi plui rapresentatîfs”.
Di ce e par cui?
Cheste e je la domande che o fasìn ai sorestants di “Friuli nel mondo” che nus somein in prime linie su la globalizazion dei nestris Fogolârs.
O vin denunciade cheste tindince l’an passât, daspò de cunvigne di Maian, dulà che si fevelave plui di marcjât che no di Friûl. E si veve reson, e tante.
Lis celebrazions pai 150 agns de unitât de Italie a son stadis une altre dimostrazion di cheste strategjie: no une vôs critiche, no un dibatit ancje tal mont de nestre emigrazion su ce che e à rapresentât pai furlans. Nuie di nuie, se no tantis “frecis tricolôrs”.
Daûr dal cjanton, la prossime mosse: la regjonalizazion des associazions. Cu la scuse de crisi, dutis dentri intun cjalderon unic, cussì che si puedin controla miôr e soredut che si puedi fa sparî chel “furlan”  che ur fâs gnervôs.
Cjalait lis fotos des tantis visitis ai Fogolârs e ai Circui di furlans ator pal mont: spes la bandier no je plui la nestre, chê vivarose dal patriarcjât, dal Friûl, ma chê – cence storie e smavide – de Regjon.
A stan vendint ancje la nestre diaspore.
DREE VALCIC