L’avignî de mont furlane al passe pes rêts di solidarietât

Dal cuadri parziâl di problemis e soluzions burît fûr in chê dì, a son vignûts in clâr un pôcs di atôrs e un pocjis di azions. Salacor nuie di gnûf, ma intune vision complessive inedite, dulà che si tache a dî che la sfide o si vinç o si piert. Ma fadiant ognidun par so cont, si piert di sigûr.
La sfide si pues vincile se intal côr a cjantin ducj, includûts i politics (o chei che a crodin di jessilu) che, pe plui part, no varessin timp di pierdi a fâ filosofie, impegnâts cemût che a son a cori daûr al concret, no scoltant cuasi nissun, intant che dut ur cole des mans.
Il côr dal vuê e dal divignî di dute la mont furlane (no dome de Cjargne) al à sì di cjapâ dentri i ents locâi e i servizis sociâi in dutis lis declinazions, ma nol cjante e no podarà cjantâ ben se nol rive o nol vûl fâ jentrâ chei che a fasin fature e che a metin passion intal mont de cooperazion (massime sociâl e di comunitât), des associazions (culturâls, di fameis, sportivis), i negozis di prossimitât, i piçui artesans, lis rêts dal turisim (tacant propit di chei “albiercs difondûts” che a jerin progjets di comunitât inte idee origjinâl dal grup di Leo Zanier, ancjemò lui), il Coordenament des proprietâts coletivis, i Ûs civics, il Forum dai bens civics e di Economie solidarie, il Centri di servizis pal volontariât, la galassie des parochiis e des organizazions leadis ae religjon e, tal câs de Cjargne, il Forum atîf dal volontariât di Tumieç, e une risorse formidabile tant che la rêt (formâl?, informâl?) di CjargnaLive. Tant par meti dongje chei che a jerin in cualchi maniere rapresentâts in chê dì dal Istât dal 2017.
Simpri in chê dì, si à resonât su lis azions. Che a son potenzialmentri infinidis, ma che a varessin di jessi plui condividudis e comunicadis. Invezit, a son masse dispès sieradis inte lôr piçule realtât, inte lôr “solitudin” fate di int che e devente mate a spindisi pes comunitâts, ma che no à masse contats cui “mats” di altris paîs, che a fasin fature ancje chei e che si sintin di bessôi.
Ven a stâi, che lis peraulis decisivis a podaressin jessi trê: rêts di solidarietât. Robe pai biâts, al disarà cualchidun, fin che nol si scuvierç ancje lui biât di alc. ❚
Claudio Pellizzari