✽✽ “Mi aspetto che la pagina La Patria del Friul condivida il post e per dimostrare il suo ruolo APOLITICO”. Chestis lis peraulis testuâls, cjapâts dentri i erôrs, che il vicepresident de Regjon, Stefano Mazzolini, al à doprât par invidâ chest gjornâl a dâ note di une sô amission di erôr, causât di un fal di scriture fat di un so colaboradôr, par vie di une foto fate in ocasion de finâl di Supercope Europeane zuiade tal Stadi Friûl fra Paris Saint Germain e Tottenham.
✽✽ Permetêtmi une divagazion: ma trop vino gjoldût, tifôs di balon o mancul, cjalant lis imagjins dal nestri stadi, e sintint i telecroniscj di mieç mont che lu clamavin “Stadi Friûl” e no chel anonim e cence storie “Blue Energy”? Une ocasion di promozion turistiche che forsit no vin savût sfrutâ dal dut e che ancje il mont de informazion al à sotvalutât. Cualchidun si è rindût cont che si zuiave propit a Udin une partide che forsit no capitarà di viodi mai plui? Ben, e tant par restâ suntun teme cjalt: volìno contâ i minûts dedicâts de Rai al avigniment e confrontâju cun chei dedicâts ae Barcolana?
✽✽ Tornìn però al invît dal esponent leghist, che in maniere palese al cognòs pôc chest gjornâl, che al à intal so DNA, fint de sô fondazion intal lontan 1946, la politiche tant che fuarce ideâl dal so jessi dongje dal popul furlan.
Clâr che no je chê politiche che vuê o osservìn il so lunc declin, la derive dai ideâi e, tocjant il Friûl, la sumission, il vualivament aes logjichis di partît e aes segretariis romanis o lombardis che a sedin. Si trate simpri di centralisim aplicât ae nestre realtât.
✽✽ E mi ven di fâ muse di ridi, se nol fos tragjic, constatâ che personis che nus guviernin a confondin la politiche cu la logjiche di partît, che ogni discussion e devente no confront di ideis, ma formazion in assolût.
✽✽ La “Patrie dal Friûl” – si scrîf cussì, vicepresident – e je nassude in graciis dal impegn di dôs figuris straordenariis: pre Bepo Marchet e Felix Marchi. Il prin al jere un predi, il secont un dentist anarchic. Ideis diviersis, doi monts che a someavin inconciliabii, ma l’amôr pal Friûl al jere plui fuart di ogni ideologjie. Ve, cheste e je la nestre storie e al pues capî, duncje, che no sarìn, e nancje no podaressin mai jessi, apolitics. ❚
