L’acuilut furlan daûr de sisilute di Glemone?

Dopo des ultimis elezions aministrativis e europeanis al somearès che alc si movi tal sfuei mefitic de politiche furlane. No grandis robis ma, ca e là, un sgripiament che o sperìn che al vadi indenant. Doi de regjon a Strasburc nol è un event che al capiti dispès. Al jere capitât la volte stade, cinc agns fa, cun Lizzi e Dreosto, par merit di un grant risultât di Salvini che al somearès sfantât, ancje se la Leghe in regjon e ten ancjemò. Doi tal parlament de Europe che, però, cun dut il rispiet, a àn puartât pôc chenti. Si sperave di plui. Po stâi che a vedin fat un lavôr daûr des filis, pal partît e forsit pe Italie, ma in Friûl no podìn regjistrâ risultâts di nivel, ni in tiermins politics, ni di autonomie, ni di economie. Sperìn che cui doi di cheste tornade – la sindiche di Monfalcon, Cisint, paladine de identitât nostrane cuintri i musulmans, e il sindic di Pordenon Ciriani che, ancje se di divignince dal furlanissim Manaçons, nol à volût ancjemò fâ jentrâ il Comun sul Nunciel te Assemblee de Comunitât Linguistiche Furlane – lis robis a mudedin, ancje parcè che simpri di plui la posizion transfrontaliere, plurilinguistiche, pluriculturâl de nestre regjon e podarès zuiâ un rûl une vore impuartant e cetant simbolic in chest cjanton di Vecjo Continent, soredut in dì di vuê che il “sintiment” de Europe al somee une vore smamît.
◆ In cheste Vierte, cussì malsestade dal pont di viste meteorologjic, o vin però di regjistrâ cualchi strabalç ancje tal cjamp de politiche furlane. In particolâr, o viodìn un movisi interessant de assessore regjonâl al belanç che in plui di cualchi ocasion e à dât prove di vision e di un ciert ativisim.
◆ Ai trê di Avrîl in chel di Tarcint, ae fieste de Patrie dal Friûl, un intervent ben petât sul furlan come lenghe protagoniste a GO2025, e une posizion vierte a un dibatit seri par pensâ ai ents di aree slargjade, evitant di tornâ “sic et simpliciter” aes vieris provinciis zaromai superadis, e po intervistis par furlan un pôc pardut che a palesin rapuarts ben sestâts cu la Curie cjargnele ma ancje cu la Confindustrie di Udin. Un rapuart salt cul president Fedriga ma buinis relazions ancje cui “potents” dal so e di chei altris partîts.
◆ Ma soredut o vin lumât la sô biele musute daûr di une vore di prins citadins, confermâts ma ancje gnûfs, sedi te Comunitât des Culinis ma ancje in Cjargne, tal Glemonat e fintremai tal Friûl di Mieç. Che la frute e vedi pontade la bandiere zale e blu e e comenci a fâ rêt? Che al sedi un segn di un tornâ dal partît ae “Lega Nord” di stamp vieri, al sindicât des partidis IVZ e no dome cuintri dai migrants? Il partît che al veve puartât une svintade di novitât te politiche taliane, mandant in sflics il dogme de “Unità irrinunciabile dello Stato italiano” e no dome chel dal puint sul stret di Messine?
◆ La acuile dal Friûl, duncje, e pararès che e torni a sgripiâ. Par merit de sisilute di Glemone. Nol sarès mai masse adore… ❚