LABORATORI DI AUTONOMIE. 3. RIVIS DARCJAN, Comunicazion

Gjornâi, radio, television. La vôs furlane no mancje tal panorame de comunicazion regjonâl. Pûr vint un leader di marcjât che al continue a fâ ploie e soreli.
Ma par podê incidi di plui, al coventarês zuiâ in atac e no in difese. Bandonant magari bataiis di retrovuardie e pontant di plui su cuistions che a van dretis te panze e tal cerviel de int. Il tierç apontament dal cicli di laboratoris che si è tignût ai 30 di Otubar a Rivis Darcjan, te sale consiliâr, in struc al à fat passâ chest messaç. A meti sot la lint il rapuart tra autonomie e comunicazion a jerin stâts clamâts tant che relatôrs Antonio Banchig, diretôr dal Novi Matajur, Mauro Missana di Onde Furlane, Roberto Pensa di La Vita Cattolica, Fulvio Romanin di Ensoul e il nestri diretôr de Patrie, Dree Valcic, ducj moderâts dal diretôr dal mensîl Il Friuli, Giovanni Bertoli.
O stin vivint in timps dulà che la cuistion economiche e je preminente su dut il rest, cussì come chê sanitarie e de scuele, par esempli. Alore, il teme de autonomie in gjenerâl nol rive a scjaldâ i cûrs come che a al è sucedût tal passât. La int in dì di vuê e cîr rispuestis sul lavôr che nol è, su pes tassis che a cressin, sul ospedâl che si trasforme. E compit de informazion duncje al devente leâ chescj problemis tra di lôr, fâ resonâ e provâ a prospetâ soluzions concretis che, vint une regjon a statût speciâl, si podaressin frontâ in maniere plui organiche e funzionâl.
I relatôrs a àn fat notâ che dal rest, pûr viodint un grues moviment a nivel internazionâl in fat di autonomiis e rivendicazion teritoriâls – il riferiment al va ae Scozie o ae Catalogne –, chi in Friûl si stente un grum e e mancje la rispueste de int aes propuestis che puntualmentri cualchidun al cîr di inmaneâ. Si à segnalât po dopo cemût che la crisi dai partîts tradizionâi e vedi lassât potenzialmentri un spazi enorme ai temis de autonomie e de identitât. Nissun però al somee in stât di cjapâ in man la ocasion.
A chest pont, ancje il mont de informazion al à ametût di vê di fâ autocritiche, resonant sui siei limits, su la sô autonomie, su lis proprietâts dai mieçs di comunicazion, sui inserzioniscj e sui contribûts publics che si ricevin. Ma si à ancje provât a cjalâ plui in là, ricognossint che lis gnovis tecnologjiis, i social network a son canâi che no si pues gran trascurâ: propit dentri di chei a stan cressint i furlans dal doman, abituâts a formis di espression e di comunicazion plui sveltis, e che istès a dimostrin di jessi leâts aes tradizions, ai valôrs di cheste tiere e ae sô identitât. Segnâi che a fasin ben sperâ e che il mont de informazion nol pues fâ fente di no viodi. In sostance, la nestre autonomie e à di jessi fate cressi cun cussience, declinant tal concret dut ce che e pues puartâ cun se. E soredut, cence pôre di chei altris, biacemai sierâsi tal fuartin; anzit, al vûl stât daûr ae strade di chei furlans che tal mont, par esempli a nivel artistic, a stan dimostrant di podê primâ in tancj setôrs.❚
David Zanirato