LA VÔS DE CISL. Mod. 730 precompilât: semplificazion fiscâl?

Il Consei dai Ministris al à prontât di pôc il scheme di un gnûf Decret Legjislatîf che al conten novitâts in materie di semplificazion fiscâl. Il scheme dal proviodiment al è rivat cumò li des comissions Parlamentârs competentis pe acuisizion dal parê.
Tra lis novitâts, chê che e je daûr a fâ plui scjas al è il mod. 730 precompilât. Dal 2015 e ven proponude in vie sperimentâl la pussibilitât pal contribuent di otignî in linie de bande de Agjenzie des Jentradis il propri mod. 730 za precompilât in cualchi sezion, par esempli:
– Redits di lavôr o di pension, certificâts dal CUD.
– Interès passîfs e carics relatîfs pai mutuis.
– Premis di assicurazion su la vite, cause muart e cuintri i signestris.
– Contribûts previdenziâi e assistenziâi.
– Contribûts metûts in formis di previdence complementâr.
Il contribuent al podarà acetâ la declarazion come che le à prontade il fisc o al podarà cambiâle.
Impuartantis, par fâ funzionâ dut il mecanisim, a son lis tempistichis: dentri dai 28 di Fevrâr lis bancjis e lis assicurazions a varan di comunicâ ae Agjenzie des Jentradis i premis e i interès paiâts pai mutuis; dentri dai 7 di Març i sostitûts di impueste a varan di fâ ancjetant cui CUD.
E je rimandade al 2016 la acuisizion de bande de Agjenzie des Jentradis dai dâts relatîfs aes prestazions sanitariis (ASL, aziendis ospedalieris, istitûts di ricovar, farmaciis, e v.i.) che a laran a completâ il 730 precompilât.
Intal câs là che il contribuent al aceti la declarazion precompilade e che le spedissi cence modificazions, di fat al varà la esenzion dai controi formâi, stant che a son stadis dopradis informazions furnidis de Agjenzie stesse.
Intal câs invezit che al vueli cambiâ il 730 precompilât variant i dâts za metûts o completantju cun altris informazions, al podarà doprâ simpri il canâl telematic pe spedizion de declarazion cambiade o al podarà indreçâsi a un CAF che, di là de spedizion de declarazion, al fasarà – daûr de  disposizion normative – il control formâl e la aposizion dal vistât di conformitât, assumintsi la responsabilitât di eventuâi erôrs intes sezions sometudis a control (a son esclududis lis cundizions subietivis che dan dirit aes detrazions/agjevolazions, tant che par esempli il dirit ae detrazion par familiârs a caric, la sussistence de carateristiche de residence pal mutui, la presince dal stât di disabilitât pe detrazion di cualchi cjame, e v.i.).
Su la cjarte, cheste novitât e rapresente un pas impuartant viers un fisc plui facil pal contribuent.
Par esempli, intai ultins doi agns la mancjade spedizion de bande dal Inps dal CUD in cjarte sedi ai pensionâts che ai sogjets titulârs di prestazions assistenziâls (casse integrâts, disocupâts) e je daûr a creâ problemis di “declarazions infedêls”. Soredut, i sogjets in casse integrazion o in disocupazion no san che il redit erogât dal Inps si pues imponi in maniere fiscâl e duncje al fâs “grum” cun chei altris redits cjapâts dilunc dal an. Si che duncje, sedi inte compilazion de declarazion dai redits che di altris tipologjiis di declarazions (model Isee, autocertificazion par esenzion ticket, e v.i.) al sucêt dispès che chescj redits a sedin lassâts fûr.
Vê la pussibilitât di vê il 730 precompilât cun ripuartât il totâl dai redits cjapâts, al evitarès chescj erôrs leâts ae ignorance pitost che ae malefede.
Però, se pal contribuent cheste e sarès une vere semplificazion, pe Agjenzie des Jentradis un pôc mancul. La pôre e je che si assegnin oblics gnûfs e fadiôs ai uficis tributaris di adempî a paritât di risorsis umanis e finanziariis. Chest al podarès compuartâ dificoltâts operativis e prejudicâ chês altris ativitâts za davueltis de Agjenzie. Insume, il pericul al è che invezit di otignî une semplificazion si otegni un gnûf motîf di confusion pal contribuent.
❚ ✒ Marianninna Rocco, Responsabile Fiscâl CAF CISL Udin