LA VÔS DE CISL. IUC la gnove Impueste Uniche Comunâl

E je stade istituide une gnove impueste basade su chescj doi supuescj impositîfs:
1. possès di imobii;
2. erogazion e fruizion dai servizis comunâi.
Cheste impueste e je articolade in dôs componentis:
– la prime, la IMU, di nature patrimoniâl, che e varà di jessi paiade dal possessôr dai imobii, escludude la abitazion principâl;
– la seconde, riferide ai servizis, articolade in:
– TASI (Tribût pai servizis indivisibii), a front de cuviertidure dai coscj dai servizis indivisibii dal Comun;
– TARI (Tasse sui refudums), pe cuviertidure dai coscj dal servizi di gjestion dai refudums urbans (abrogade la TARES).
TARI
Il supuest de TARI al è il possès o la detenzion, a cualsisedi titul, di locâi o areis scuviertis par  cualsisedi ûs, che a produsin refudums urbans.
La superficie di podê subietâ ae TARI e je chê che si pues cjaminâi parsore, come che al jere za previodût pes ex TARSU / TIA / TARES.
Il Comun al pues previodi riduzions o esenzions tarifariis, par esempli in chescj câs:
a) abitazions cuntun sôl ocupant;
b) abitazions tignudis a disposizion par ûs stagjonâl o par un altri ûs limitât e discontinui;
c) abitazions ocupadis di subiets che a stan o che a àn la cjase tal forest par plui di 6 mês ad an;
e) fabricâts rurâi a ûs abitatîf.
La TARI no je dovude in relazion aes cuantitâts di refudums assimiladis che il produtôr al dimostre di vê inviât al recupar. Cun di plui, in câs di ocupazion o detenzion temporanie, la TARI e je dovude su la base di tarife zornaliere.
TASI
Il supuest de TASI al è il possès o la detenzion, a cualsisedi titul, di fabricâts – includude la abitazion principâl -, e areis scuviertis/edificabilis, destinadis a cualsisedi ûs.
La alicuote di base de TASI e je dal 1 par mil. Il Comun al podarà, cun delibare specifiche:
– ridusi la alicuote fin al azerament o previodi riduzions /esenzions tarifariis;
– determinâ la alicuote di mût che la sume tra la stesse e la alicuote IMU no sedi superiôr ae alicuote IMU massime statâl dal 10,6 par mil. Pal 2014, la alicuote massime no pues passâ il 2,5 (pai fabricâts rurâi no pues passâ l’1 par mil).
Pe unitât imobiliâr ocupade di un incuilin o comodatari, la TASI a lôr caric e je fissade dal Comun inte misure fra il 10% e il 30% dal totâl complessîf; il rest al è dovût dal proprietari o usufrutuari.
In chestis ultimis setemanis a son in discussion une schirie di emendaments che a previodin la pussibilitât par ogni Comun di une alicuote in plui di doprâ in maniere flessibile su la prime o la seconde cjase, garantint cussì lis stessis detrazions che a jerin cu la IMU e la cuviertidure de jentrade economiche plui basse, dovude al passaç de IMU ae TASI. ❚
✒ Mariannina Rocco
Responsabile Fiscâl Caf Cisl Udin