La visite contrastade di Zuan Pauli II in Friûl

O podìn dî subit che l’an 1992 al è stât unic tal so gjenar: l’an de vignude di Zuan Pauli II in Friûl, de consegne al pape de Bibie par furlan in siet volums, de racuelte des 13.000 firmis a difese des lenghis furlane, slovene e todescje e soredut un an li che i predis e i grups di glesie a scombatevin vivarôs e no vevin pôre di fâ sintî la lôr vôs diferente e alternative.
◆ Par Glesie Furlane o desideri ricuardâ un incuintri fat te canoniche di Vasinas vinars ai 19 di Jugn aes nûf soresere. Motîf: la polemiche di GF e soredut di pre Antoni Beline in relazion ae visite dal pape e l’afront di cualchi predi dai nestris che si jere permetût di no partecipâ ae messe dal pontefiç tal stadi Friûl. Articui, intervistis, fats iresponsabii che a meretavin, de bande dal vescul Alfredo Battisti, une tirade di orelis fuarte a dut il grup.
Il vescul al veve mandât l’avîs. La rispueste: “O cirarìn di jessi puntuâi, come che o podìn, par vie che passantdoman e colarà la solenitât dal Corpus Domini e cualchi plevan al varà lis primis comunions.”
◆ O sin presints al incuintri un biel trop: undis di nô; a mancjin pre Antoni Beline, pre Renzo Dentesan e pre ’Sef Cjargnel. Ducj o jerin dacuardi di no fâ polemichis, di no stiçâ, in mût che il vescul al les vie il plui pussibil seren.
Bons. Battisti, dopo i salûts, al jentre subit in argoment e si ferme su la partecipazion dai militârs in divise aes manifestazions, polemiche al dîs lui, sglonfade dai gjornâi.
◆ Infin si rive ae sostance dal incuintri. Il vescul al dîs: “Ci sono in giro preti che affermano che voi non credete al primato del papa. Se questo è vero, è gravissimo. Sono venuto come vescovo a sincerarmi e ad aiutarvi a rivedere le vostre posizioni alla luce dei Concili Vaticano primo e secondo. Infatti come parroci voi avete delle responsabilità nelle parrocchie e non è ammissibile…”
Noaltris o restìn maraveâts di chestis notiziis e caluniis; nissun di noaltris al à mai cjacarât cuintri i dogmis de glesie. Ognidun al dîs la sô cun calme, ma il vescul nol sint bot e al bat chê e simpri chê: il pape al è vicjari di Crist, al è infalibil, al à jurisdizion assolude su ogni fedêl…
◆ O sin lâts indevant cussì fin cuasi a miezegnot. Noaltris o continuavin a ripeti che no vin problemis teologjics e lui al continuave a bati sul magjisteri di Rome. O scrupuli che Battisti al fos rivât al incuintri convint che noaltris o jerin cuintri il primât dal pape; nus à scoltâts, ma scoltantnus si è tornât a convinci che e jere propri vere e al è restât cun chel savôr in bocje. A conclusion, o vin fat un cjant in sloven ae Madone, o vin bevût un bon tai di vin, il vescul nus à dade la man a ducj e al è partît cun muse di ridi ma no content.
Jessût, il nestri coment al è stât: il vescul al à batût dute la sere sul vueit e il vêr probleme, lis sieltis pastorâls che il viaç dal pape al poneve, nol è stât tocjât.
◆ Cualchi zornade dopo e sarès rivade a ognidun di noaltris par pueste une letare datade ai 20 di Jugn dal ’92 li che il vescul al ripuartave di gnûf strissulis di documents sul primât dal pape e al esortave ae comunion eclesiâl.
O pensi che ognidun di nô, chê esortazion le vebi lete e rivât da pît le vebi metude di bande: in veretât, no nus tocjave.
◆ Battisti al jere une persone inteligjente e ancjemò vuê mi domandi se cheste sô iniziative e jere farine dal so sac o invezit se e fos stade imponude di cualchidun. Forsit al sarà stât chest e chel.
Vuê, ricuardâ chest avigniment al è sempliç, ma tal vivilu trentedoi agns indaûr, tu capivis che al jere pôc ce scherçâ.
◆ Il viaç dal pape dal 1992 nol è l’unic esempli di contrast fra predis e vescul te nestre diocesi. Baste pensâ al 1927 cuant che i predis a son rivâts a mandâ vie, cu la aprovazion dal pape Piu XI, il vescul Anastasio Rossi; o ancje ai predis slovens che al timp dal fassisim a àn fat intervignî la segretarie di stât vaticane pal dirit di predicjâ te lenghe dal popul. O podìn ricuardâ ancje il “Libro bianco sulla mozione del clero friulano con appendice sui problemi diocesani” Udin 1967-1968; e fin chê altre dì, la azion pastorâl dal predi Pierluigi Di Piazza cuintri i armaments militârs e par une glesie “fûr dal templi” libare di vecjis ideologjiis e dai peams cul podê. I predis furlans e slovens a rispietin la autoritât, a àn il sens de istituzion ma a sintin di vê dirit a une ubidience responsabile. Cuant che nol è rimiedi, si dan ancje par agns a une resistence passive e cidine; altris voltis si metin tune oposizion clare e nete, in cussience, fûr de autoritât.
◆ La visite contrastade di Zuan Pauli II in Friûl aromai e je aghe passade. Che a valin pal avignî lis peraulis dal nestri gnûf vescul Riccardo: “Mandi. Di bessôi, ma insiemi”. ❚