La Vierte che e scjalde la tiere, e che e puarte la ploie

La Vierte e tache, pai meteorolics, cul prin di Març. Il nestri emisferi, che vie pal Invier al mostrave la schene al soreli, al tache a voltâsi; lis zornadis si slungjin e i rais dal soreli a rivin jù plui a plomp. Il teren al tache a scjaldâsi, lis massis di aiar cjalt a vuelin sburtâ viers Miezegnot. In rispueste a chescj sburts, lis ondis planetariis a deventin plui malcuietis, a tachin a movisi cun grandis voltis, a sticin l’aiar sul Atlantic e a nassin grandis perturbazions, che i vints ocidentâi a soflin fin su la Europe, puartant cetante ploie. Chenti, il garbin al torne a sglonfâsi di umiditât passant sul Adriatic e al discjame dut su lis nestris monts, ancjemò fredis dal Invier. Cussì, in val e in plan o vin lis grandis ploiis, ma avonde adalt la Vierte e puarte lis nêfs plui bondantis.
◆ Une stagjon cussì dinamiche e mostre i prins cjalts, ma ancje i ultins frêts, massime cuant che la Vierte e je sul imprin. Par esempli, al prin di Març dal 2005 une basse pression artiche su la Europe centriorientâl nus sburtà intor massis di aiar frêt, daspò di un Invier nancje cuissà ce frêt. La stazion di Udin Sant Svualt e regjistrà une minime di -10,4°C. Cui 3 di Març, a colarin a Udin citât 10cm di nêf. Lant plui indaûr, ai 8 di Jugn dal 1956, un dai agns plui frêts de storie resinte, e rivà nêf fintremai in citât a Trent. La Vierte, intai ultins agns, nus ufrìs ancje un dai aspiets plui contraditoris dal cambiament climatic: intun clime che si scjalde, al sucêt, in Friûl e no dome, di podê vê plui frêt e nêf vie pe Vierte che no vie pal Invier. Un câs che al pues fâ scuele al è chel dal 2019, cuant che si à vût un Invier cjalt e cence nêf in dute la Alte Italie, ma inte prime setemane di Mai e je rivade une neveade bondantone, fin a 200m su la Emilie. Come che o viodarìn il mês che al ven, la pussibilitât di vê criùris vie pe Vierte dopo di Inviers cjalts e pues jessi un fastidi grues. Dut câs, ancje la Primevere, su lis tindincis lungjis, e je daûr a scjaldâsi, come dutis lis stagjons. Il mês di Avrîl dal an passât al pues jessi tignût tant che esempli: cjapant a riferiment la stazion di Pordenon, il plui dal mês al è stât cjalt, cun massimis parsore dai 25°C tal mieç e ae fin dal mês, ancje se cuntune tierce decade pluitost frede; la temperadure dal mâr misurade a Triest, però, e je stade in medie di 15,1°C, record storic di cjalt in Avrîl dal 1934 incà. ❚