Sostignibilitât europeane dal cjamp ae taule

Al è strategjic fâ cressi la agriculture biologjiche
Par rinfuarçâ l’impegn de Ue sui temis agricui, de alimentazion e de sigurece alimentâr, ai 20 di Mai dal 2020 la Comission europeane e à publicât la Strategjie “Dal produtôr al consumadôr”. La Strategjie e smire sì a riformâ il marcjât interni, ma ancje a fâ deventâ il sisteme alimentâr european un standard globâl in materie di sostignibilitât e di responsabilitât sociâl, cemût che al è stât individuât ancje di standards ISO specifics. La iniziative e previôt un coinvolziment atîf di dutis lis parts interessadis, e tra chês lis impresis che a operin intal setôr agroalimentâr, clamadis a davuelzi un rûl impuartant integrant la sostignibilitât intai propris modei di business e disfrutant lis oportunitâts che cheste transizion ur ufrirà. La stesse dì, par altri, e je stade presentade ancje la Strategjie su la biodiversitât, conetude ae prime stant che e je un element fondamentâl par difindi la sigurece alimentâr, par sigurâ dietis sanis e sostanziosis e par miorâ sedi i mieçs di sussistence des zonis rurâls sedi la produtivitât agricule.
Une Strategjie cun sîs obietîfs
La Strategjie “Dal produtôr al consumadôr” e je incentrade su sîs obietîfs principâi: garantî la sostignibilitât de produzion alimentâr; garantî la sigurece de provision alimentâr; stimolâ pratichis sostignibilis intai setôrs de trasformazion alimentâr, dal cumierç ad in grues e al detai, alberghîr e dai servizis di ristorazion; promovi un consum alimentâr sostignibil e agjevolâ il passaç a regjims alimentârs sans e sostignibii; ridusi lis pierditis e lis straçariis alimentârs; combati lis fraudis alimentârs dilunc de filiere alimentâr.
◆ I targets specifics prefissâts par ogni macro obietîf, pal an 2030, a son tancj e ambiziôs. Tra chescj, si segnalin: la riduzion dal 50% dal ûs dai pesticidis plui pericolôs; la riduzion di almancul il 20% dal ûs di fertilizants; la riduzion dal 50% des straçariis alimentârs pro capite a nivel di vendite al detai e di consumadôrs; la elaborazion di un codiç di compuartament de Ue par pratichis comerciâls e di marketing responsabilis; la assegnazion dal 25% dal totâl dai terens agricui ae agriculture biologjiche.
La agriculture biologjiche in Italie e in Friûl
Su chest ultin pont, cemût sino? Cuâi sono i numars di partence?
Stant al Rapuart Sinab 2020 (su dâts riferîts al 2019), in Italie la agriculture biologjiche e ven praticade sul 15,8% de superficie agricule (al è il 7,5% in Europe), intant che lis aziendis agriculis bio a rapresentin il 6,2% di chês complessivis. Numars che a placin la nestre Penisule ai prins puescj in Europe par chest setôr, campion di sostignibilitât. O sin metûts un pôc piês inte nestre regjon che si coloche al 16st puest tra lis regjons talianis plui o mancul bio. Di fat, a son 12.800 i etars coltivâts daûr des normis bio (il 5,5% dai complessîfs) e i operadôrs a son 920 (il 3,9% dal totâl). Par altri, superficiis bio e operadôrs a son daûr a calâ a pet dal 2018. Un pas indaûr che al à, però, di deventâ un moment di sburt par ricjapâ la corse par centrâ i obietîfs di sostignibilitât dal deceni prossim. ❚