Ve chi cemût che al cambie l’ort furlan
Il compart orticul furlan al è stât fotografât dai tecnics dal Ersa cuntune rilevazion meticolose dal 2018 che si pues confrontâ cuntune compagne davuelte cui stes criteris tal 2011.
◆ Des 379 aziendis regjonâls che si dedichin ae orticulture, censidis tal 2011, si è passâts aes 410 di cumò, cuntun increment dal 8%. Cuasi dopli al è stât invezit il slargjâsi de lôr estension (+14%) che e rive a 972 etars. Lis tipologjiis comerciâls di coltivazion evidenziadis de ricercje a sono stadis 119. Al è avonde ben rapresentât il setôr des coltivazions biologjichis, che al cjape dentri plui dal 17% des aziendis cuntune incressite grandonone (+96%), a pet de rilevazion di siet agns indaûr.
◆ Di marcâ ancje la variazion des areis protezudis cun rêts o sidreris, che a son passadis di 64 a 76 etars (+19%) ma a restin, tant che tal 2011, une part une vore limitade de estension totâl dai nestris orts (dome il 7% des areis destinadis aes ortaiis). La Ersa al stime che la produzion orticule vendibile de regjon e sedi in dut, al sporc, di 60 milions di euros e, cuntun cuantitatîf di 30 mil toneladis par an, e rivi adore a rispuindi dome al 18% dai consums di verdure dai furlans: dut câs al è just evidenziâ che cheste cuote di marcjât e cres une vore, stant che tal 2011 la percentuâl e jere pôc plui dal 10%.
◆ Lis diferentis cualitâts di lidric, cun 210 etars, a rapresentin la ortaie plui coltivade in regjon, cuntune tindince di incressite fuarte (+150%) pes varietâts locâls: Rose di Gurize e Rose dal Lusinç, cuntun centenâr di aziendis che si ocupin de lôr produzion.
◆ Ancje la coltivazion dai sparcs (blancs, verts e colôr viole) e je in grande incressite (+50%) e, in dì di vuê, e ocupe 209 etars par une produzion vendibile di plui di 9 milions di euros al sporc.
◆ No va masse ben, invezit, la ande de coltivazion des patatis (tierce ortaie plui presinte tai orts furlans, cun 130 etars) parcè che la estension dedicade aes “cartufulis” si è ridusude dal 30%.
◆ Il cauliflôr al è la varietât plui coltade di verzis (93 etars), ancje se in chescj agns si è rivâts a riscuvierzi une coltivazion tradizionâl furlane, che e zove ancje ae salût, tant che il brocul di fuee.
◆ Chês che par talian si clamin “orticole da taglio” a ocupin, dutis insiemi, une estension di 23 etars. Lis cucurbitaciis (cocis, coçuts, cudumars, melons) a cuvierzin 91 etars di coltivazion cuntun aument des estensions coltadis a coce che al è rivât al 29%. A cressin ancje i liùms che a ocupin cirche 87 etars, intant che e reste stabile la coltivazion dai râfs (44 etars), ancje se e je la materie prime doprade par produsi la uniche Dop regjonâl tal setôr des pomis e des verduris: la broade, che e je tutelade za dal 2011.
◆ E ocupe 45 etars la coltivazion dal selino (+25% a pet dal 2011), pe plui part dedicâts ae coltivazion de varietâts di râf (85%), produzion carateristiche regjonâl.
◆ Stabile la produzion dai pevarons e in fuarte riduzion la melanzane (-50%). Si sbasse, ancje se di pôc, la coltivazion dal pomodoro (-7%) che e tocje 27 etars. Stabilis ancje lis estensions destinadis a cevole (18 etars), puar e ai. In contrazion, la coltivazion de spinaze (32 etars) e de latuie (13). ❚
